BYD kompaniyasi 26-may kuni 2026-yilgi yangilangan BYD Sealion 06 DM-i krossoverini rasman sotuvga chiqaradi. Model Xitoy bozorida taqdim etiladi. Narxlar va barcha texnik tafsilotlar taqdimotdan keyin e’lon qilinadi.
Yangi krossover BYD’ning beshinchi avlod DM-i gibrid tizimi asosida ishlab chiqilgan. Avtomobil 1,5 litrli benzin dvigateli va elektromotor bilan jihozlanadi. Benzin motori 101 ot kuchi, elektromotor esa 218 ot kuchi ishlab chiqaradi.
Modelning asosiy yangiligi yurish zaxirasi bilan bog‘liq. BYD ma’lumotiga ko‘ra, krossover faqat elektr quvvatida 300 km dan ortiq yo‘l bosa oladi. To‘liq bak va to‘liq quvvat bilan umumiy yurish zaxirasi 1800 km dan oshadi. Bu shahar ichida ham, uzoq safarlarda ham qulaylik beradi.
Avtomobilning aqlli boshqaruv tizimlari ham yangilangan. Yangi Sealion 06 DM-i lidar bilan jihozlanadi. Shuningdek, unga DiPilot 300 yordamchi haydash tizimi o‘rnatiladi. Bu tizim shahar va trassa sharoitida haydovchiga ko‘mak beradi. Salonda ham bir qator qulayliklar qo‘shilgan. Krossover massaj funksiyasiga ega o‘rindiqlar, old yo‘lovchi uchun oyoq qo‘ygich va havo aromatizatsiyasi tizimini oladi. Bu yangiliklar modelni yanada qulay oilaviy krossoverga aylantiradi.
Tashqi ko‘rinish va interyer ranglari ham yangilangan. Xitoy OAVlariga ko‘ra, avtomobilning ilk partiyalari allaqachon dilerlik markazlariga yetkazila boshlagan.
BYD Sealion 06 DM-i Xitoyda o‘rta o‘lchamli gibrid krossoverlar segmentida sotiladi. Yangilangan model uzoq yurish zaxirasi, lidarli haydash yordamchisi va salondagi qulayliklari bilan raqobatchilardan ajralib turishi mumkin.
Qaynoq24.uz Chevrolet Onix narxidagi BYD Atto 3 avtomobili sotuvga chiqqani haqida yozgan edi.
