Xiaomi kompaniyasi Xitoyda Xiaomi 17T va Xiaomi 17T Pro smartfonlarini taqdim etdi. Bu haqda Gizmochina xabar berdi. Tadbir davomida kompaniyaning yangi avlod gumanoid roboti ham namoyish qilindi.
Xiaomi 17T narxi 2 999 yuandan boshlanadi. Bu taxminan $445 ga teng. Xiaomi 17T Pro esa 3 999 yuandan sotuvga chiqadi. Bu taxminan $590 ni tashkil etadi. Smartfonlar global versiyadan katta farq qilmaydi. Biroq taqdimotning eng qiziqarli qismi robot bilan bog‘liq bo‘ldi.
Namoyish vaqtida Xiaomi gumanoid roboti Xiaomi 17T Pro‘ni qo‘liga oldi. U bionik qo‘l yordamida telefonni ushladi, ovoz tugmalari orqali zumni sozladi va suratga oldi.
Bu qisqa namoyish Xiaomi’ning robototexnika yo‘nalishidagi imkoniyatlarini ko‘rsatdi. Ayniqsa robotning mayda harakatlarni bajarishi va qurilmani boshqarish qobiliyati namoyon bo‘ldi. Kompaniya so‘nggi yillarda gumanoid robotlar ustida muntazam ishlamoqda. Avvalroq Xiaomi CyberOne robotlarini o‘z ishlab chiqarish liniyalarida qo‘llashni rejalashtirayotgani haqida ma’lum qilgan edi.
Xiaomi rahbari Ley Jun gumanoid robotlarni besh yil ichida kompaniya zavodlariga keng joriy etish maqsadini bildirgan. Joriy yil boshida Xiaomi robotlari avtomobil zavodidagi maxsus ishlab chiqarish jarayonida sinovdan o‘tkazilgani ma’lum qilingan edi. Robotlar uch soatlik uzluksiz smenada ishlagan.
Sinovda ular o‘z-o‘zidan kesuvchi gaykalarni o‘rnatish stansiyasida ishlagan. Kompaniyaga ko‘ra, ikki qo‘l bilan bir vaqtda bajarilgan o‘rnatish jarayonida muvaffaqiyat ko‘rsatkichi 90,2 foizni tashkil etgan.
Robotlar ishlab chiqarish liniyasining 76 soniyalik sikl talabiga ham mos ishlagan. Bu natija Xiaomi robotlarining sanoat sharoitida amaliy vazifalarni bajara olishini ko‘rsatadi. Kompaniya robotlarda ishlatiladigan bionik qo‘lni ham yangilagan. Yangi versiya hajmi bo‘yicha 60 foizga kichraygan va inson qo‘li o‘lchamiga yaqinlashtirilgan.
Shuningdek, bionik qo‘lning erkinlik darajasi 64 foizga oshirilgan. U 8,2 ming kvadrat millimetr maydonni qamrab oluvchi taktil sensor bilan jihozlangan.
Qaynoq24.uz Xiaomi 17T smarfoni sotuvga chiqqani haqida yozgan edi.
