Vivo kompaniyasi qariyb yetti yillik tanaffusdan so‘ng Hindiston bozorida Vivo S turkumidagi yangi smartfonini taqdim etishga tayyorlanmoqda. Insayder Yogesh Brarning ma’lum qilishicha, Vivo S2 modeli 2026-yil avgust oyi boshida namoyish etilishi, uning savdosi esa taxminan 15-avgustdan boshlanishi mumkin.
V2576 model raqamiga ega qurilma Bluetooth SIG sertifikatlash bazasida ham paydo bo‘lgan. Odatda bunday ro‘yxatdan o‘tish smartfonning rasmiy taqdimoti yaqinlashayotganidan dalolat beradi. Biroq Vivo hozircha qurilmaning taqdimot sanasi va texnik xususiyatlarini rasman tasdiqlamadi.
Taxminlarga ko‘ra, Vivo S2 premium o‘rta narx segmentida joylashtiriladi va Hindiston bozorida Oppo Reno 16 Pro kabi smartfonlar bilan raqobatlashadi. Yangi model zamonaviy dizayn, takomillashtirilgan kameralar va tasvirni qayta ishlash imkoniyatlariga urg‘u berishi kutilmoqda. Shuningdek, smartfon Vivo‘ning xalqaro bozorda sotiladigan V turkumidagi ayrim modellari asosida ishlab chiqilishi mumkin.
Vivo S turkumining avvalgi modeli — Vivo S1 Hindistonda 2019-yilda taqdim etilgan edi. Smartfon 6,38 dyuymli Super AMOLED ekran, MediaTek Helio P65 protsessori, 16 megapikselli asosiy, 8 megapikselli ultra keng burchakli hamda 32 megapikselli old kamera bilan jihozlangan. Qurilma 18 vattli quvvatlashni qo‘llab-quvvatlaydigan 4 500 mA/soat sig‘imli batareyaga ega bo‘lgan.
Vivo S1’ning 4 GB tezkor va 128 GB ichki xotiraga ega boshlang‘ich versiyasi Hindistonda 17 990 rupiydan sotuvga chiqarilgan edi. Yangi Vivo S2’ning narxi esa mamlakatda 50 ming rupiydan oshmasligi kutilmoqda. Narxning sezilarli darajada oshishiga smartfonlar bozori hamda xotira chiplari narxidagi o‘zgarishlar sabab bo‘lishi mumkin.
Vivo S2’ning protsessori, displeyi, operatsion tizimi, kamerasi va aniq narxi haqidagi batafsil ma’lumotlar rasmiy taqdimot yaqinlashgani sari e’lon qilinishi kutilmoqda.
Qaynoq24.uz Vivo X500 Ultra uchun uchta 200 MP kamera sinovdan o‘tkazilayotgani haqida yozgan edi.
