iQOO kompaniyasi Hindiston bozorida Z11 seriyasining yana bir modelini taqdim etishga tayyorlanmoqda. Standart iQOO Z11 smartfoni avgust oyida sotuvga chiqishi kutilmoqda. Qurilma avvalroq namoyish etilgan Z11 Lite va Z11x 5G modellariga qo‘shiladi.
Dastlabki ma’lumotlarga ko‘ra, Hindiston uchun ishlab chiqariladigan iQOO Z11 mamlakatda MediaTek Dimensity 7500 Turbo protsessorini olgan ilk smartfonga aylanadi. Sakkiz yadroli yangi chip o‘rta toifadagi qurilmalar uchun unumdorlik va energiya samaradorligi muvozanatini ta’minlashga mo‘ljallangan.
Hindiston versiyasi Xitoyda sotilayotgan modeldan protsessori bilan farq qiladi. iQOO Z11’ning Xitoy modifikatsiyasida kuchliroq Dimensity 8500 platformasidan foydalanilgan. Hindiston uchun nisbatan arzonroq chip tanlanishiga so‘nggi vaqtlarda smartfon qismlari narxining oshgani ta’sir qilgan bo‘lishi mumkin.
Yangi smartfonning yana bir muhim jihati chetlari bukilgan 3D ekran bo‘ladi. Bunday displey qurilmaga yuqori toifadagi modellarga xos tashqi ko‘rinish berishi va uni tekis ekranli raqiblardan ajratib turishi kutilmoqda.
iQOO Z11 mart oyida Xitoyda taqdim etilgan edi. Ushbu versiya 6,83 dyuymli AMOLED ekran, 1 260 × 2 800 pikselli aniqlik va 165 Gtsgacha yangilanish chastotasiga ega. Displey 300 Gts sensorli javob tezligi, HDR va DCI-P3 ranglar diapazonini to‘liq qamrab olish imkoniyatini qo‘llab-quvvatlaydi.
Xitoy modelida 3 nanometrli texnologiya asosida tayyorlangan Dimensity 8500 protsessori, 16 GBgacha tezkor va 512 GBgacha ichki xotira mavjud. Smartfon 9 020 mA·soat sig‘imli batareya bilan jihozlangan bo‘lib, 90 vattli tezkor quvvatlashni qo‘llab-quvvatlaydi.
Kamera tizimi optik barqarorlashtirish funksiyasiga ega 50 megapikselli asosiy sensor va 2 megapikselli chuqurlik modulidan iborat. Old panelda esa 16 megapikselli selfi kamerasi joylashtirilgan.
Qaynoq24.uz iQOO kompaniyasi smartfonlarida 10 000 mA/soatli batareyani qo‘llashi haqida yozgan edi.
