Xiaomi Civi seriyasi bilan xayrlashmoqda. Besh yil davomida oltita modelni o‘z ichiga olgan liniya endi davom ettirilmasligi kutilmoqda. Weibo‘dagi taniqli insayder Digital Chat Station ma’lumotiga ko‘ra, Xiaomi Civi seriyasi yopilgan va kelasi avlodda uni qayta tiklash rejalari ko‘rinmayapti.
Bu xabar bir necha oy davom etgan qarama-qarshi ma’lumotlardan keyin paydo bo‘ldi. Avvalroq Civi 6 modeli ustida ishlar qayta boshlangan bo‘lishi mumkinligi haqida xabarlar tarqalgan edi.
Fevral oyidagi ma’lumotlarda qurilma 200 megapikselli kamera, Snapdragon 8 Elite chipi, Leica sozlamalari va sun’iy intellekt uchun alohida tugmaga ega bo‘lishi aytilgan. Biroq so‘nggi ma’lumotlarga ko‘ra, ushbu model ishlab chiqarish bosqichiga chiqmagan.
Xiaomi Civi liniyasi 2021-yilda taqdim etilgan. U asosan yupqa korpus, egri ekran, chiroyli dizayn va portret suratga olishga moslashtirilgan kameralar bilan ajralib turgan. Seriya ko‘proq lifestyle yo‘nalishidagi subflagman sifatida ko‘rilgan, ya’ni u to‘liq flagman darajasidagi Ultra modellarga muqobil, ammo dizayn va kamera imkoniyatlariga urg‘u berilgan smartfonlar qatoriga kirgan.
Civi seriyasi besh yil ichida Xiaomi Civi, Civi 1S, Civi 2, Civi 3, Civi 4 Pro va Civi 5 Pro modellarini o‘z ichiga oldi. Ularning aksariyati Xitoy bozori uchun chiqarilgan. Ayrim modellari esa boshqa nom bilan xalqaro bozorlarga olib chiqilgan. Masalan, Civi 5 Pro ayrim mamlakatlarda Xiaomi 15 Civi nomi bilan sotilgan.
Seriyaning to‘xtatilishiga turli bozorlardagi savdolar barqaror bo‘lmagani sabab bo‘lgan bo‘lishi mumkin. Civi Xitoyda o‘z auditoriyasiga ega edi, biroq global miqyosda Xiaomi uchun alohida liniyani saqlab qolish yetarlicha samarali bo‘lmagan ko‘rinadi. Shu sababli kompaniya bu segmentni boshqa seriya orqali yopishga qaror qilgan bo‘lishi mumkin.
Qaynoq24.uz Honor yoki Xiaomi taqqoslangani haqida yozgan edi.
