Nigeriyaning shimoli-sharqidagi Borno shtatida davom etayotgan vabo epidemiyasi oqibatida vafot etganlar soni 74 nafarga yetdi. Kasallik minglab odamlarda gumon qilinmoqda.
Hozirgacha shtatda 7 850 ta vabo gumon qilingan holat aniqlangan. Kasallik 14 ta mahalliy ma’muriy hudud va 50 ta kichik hududga tarqalgan. Bemorlar sonining ortishi tibbiyot muassasalariga tushayotgan yuklamani keskin oshirmoqda.
Mutaxassislarning ta’kidlashicha, vabo “Vibrio cholerae” bakteriyasi sabab yuzaga keladi. Kasallik, asosan, ifloslangan suv va oziq-ovqat orqali yuqadi. U kuchli ich ketishi va organizmda suyuqlik yo‘qotilishiga olib keladi. O‘z vaqtida davolanmasa, kasallik o‘lim bilan yakunlanishi mumkin.
Nigeriyada vabo tarqalishiga toza ichimlik suvi yetishmasligi, sanitariya sharoitlarining og‘irligi va ayrim hududlarda samarali tibbiy yordam ko‘rsatish imkoniyatining cheklangani sabab bo‘lmoqda. Mamlakatda bezgak, poliomiyelit, ich terlama va boshqa yuqumli kasalliklar ham tez-tez uchrab turadi.
Jahon sog‘liqni saqlash tashkiloti ma’lumotlariga ko‘ra, Nigeriya Afrika qit’asida vabodan eng ko‘p zarar ko‘rayotgan davlatlardan biri hisoblanadi.
Qaynoq24.uz JSST Ebola tarqalishida xavfli kontaktlarning faqat 45 foizini kuzatayotgani haqida yozgan edi.
