BYD tarkibidagi Denza brendi yangi BYD Denza Z sportkarini iyul oyida Xitoy bozoriga chiqarishga tayyorlanmoqda. Bu haqda CNC xabar bermoqda.
Model mahalliy homologatsiya jarayonida asosiy texnik ko‘rsatkichlarini oshkor qildi. Ma’lumotlarga ko‘ra, avtomobilning maksimal quvvati 1180 kVt, ya’ni 1582 ot kuchiga yetadi.
Denza Z brendning hozirgi model qatoridan keskin farq qiladi. Denza odatda qulay minivenlar, yirik krossoverlar va grand-turer avtomobillarga e’tibor qaratib kelgan bo‘lsa, yangi Z modeli haydovchiga yo‘naltirilgan sportkar sifatida ishlab chiqilgan. Avtomobil past va keng kuzov, qiya kapot chizig‘i, haqiqiy havo kanali, bo‘rtib chiqqan orqa qanotlar, sportcha diffuzor va rombsimon orqa chiroqlar bilan ajralib turadi.
Model ikki xil kuzov turida taklif qilinadi. Birinchi versiya yumshoq tomli kabriolet bo‘lib, u yarim yashirin eshik tutqichlari, 20 dyuymli g‘ildiraklar va old hamda orqa o‘qlar uchun turli o‘lchamdagi shinalar bilan jihozlanadi. Old g‘ildiraklarda 255/40, orqa g‘ildiraklarda esa 265/40 o‘lchamli shinalar qo‘llanadi.
Dizayn va o‘lchamlar
Kabriolet versiyasining uzunligi 4780 mm, eni 1990 mm, balandligi esa 1350 mm ni tashkil etadi. G‘ildirak bazasi 2780 mm ga teng. Taqqoslash uchun, bu elektromobil Mercedes-Benz AMG GT Coupe’dan 52 mm uzunroq. Denza Z kabrioletining sof vazni 2290 kg, to‘liq vazni esa 2650 kg ga yetadi.
Ikkinchi versiya qattiq tomli rodster hisoblanadi. Ushbu talqin yashirin eshik tutqichlari, qoraytirilgan ustunlar va tom bilan farqlanadi.
Standart rodster ham 20 dyuymli g‘ildiraklarga ega. Old qismda 255/40, orqa qismda esa 295/35 o‘lchamli shinalar o‘rnatiladi. Ushbu versiya kabrioletga nisbatan 20 mm pastroq. Shunga qaramay, Denza Z saloni to‘rt kishiga mo‘ljallangan. Qattiq tomli versiyaning maksimal tezligi 300 km/soatni tashkil etadi.
Denza Z’ning sport paketi bilan jihozlangan rodster talqini ham bo‘ladi. Bu versiya yanada agressiv bamperlar va yukxona qopqog‘iga o‘rnatilgan yirik orqa qanot bilan ajralib turadi. Uning uzunligi 4870 mm ga yetadi. Sport versiyada old tomonda 275/35 ZR21, orqa tomonda esa 325/30 ZR21 o‘lchamli shinalar qo‘llanadi. Orqa qanot hosil qiladigan qo‘shimcha bosim kuchi hisobiga ushbu avtomobil 350 km/soat tezlikka chiqa oladi.
Texnik imkoniyatlar
Denza Z uchta elektromotorli kuch qurilmasiga ega bo‘ladi. Old o‘qda 500 kVt, ya’ni 670 ot kuchi ishlab chiqaruvchi TZ220QYD elektromotori joylashadi. Orqa o‘qda esa umumiy 680 kVt, ya’ni 912 ot kuchi beruvchi ikkita TZ226XYG elektromotori ishlaydi.
Tizimning jami maksimal quvvati 1180 kVt yoki 1582 ot kuchiga teng. Bu ko‘rsatkich Mercedes-Benz AMG GT Coupe’ning 860 kVt yoki 1153 ot kuchilik quvvatidan yuqori.
Elektromotorlar LFP akkumulyator bloki orqali quvvatlanadi. Batareya sig‘imi hozircha oshkor qilinmagan. Avvalroq Denza Z 0 dan 100 km/soatgacha 2 soniyada tezlashishi mumkinligi haqida xabarlar tarqalgan edi. Shuningdek, avtomobil DiSus-M magnitoreologik faol osma tizimi, tezkor quvvatlash texnologiyasi va DiPilot 5.0 haydovchiga yordam tizimi bilan jihozlanishi kutilmoqda.
Denza Z haqidagi qo‘shimcha ma’lumotlar iyul oyiga belgilangan rasmiy taqdimotga yaqinroq e’lon qilinadi. Model BYD uchun yuqori unumdor elektromobillar segmentida muhim qadam bo‘lishi mumkin. U nafaqat Xitoy ichki bozorida, balki global sport elektromobillar raqobatida ham e’tibor tortishi kutilmoqda.
Qaynoq24.uz BYD Great Han elektromobili taqdim etilgani haqida yozgan edi.
