BYD kompaniyasi tomonidan yangi BYD Great Han elektromobili Xitoyda homologatsiya jarayonidan o‘tdi. Bu haqda CNC xabar bermoqda.
Model kompaniyaning yirik flagman sedanlaridan biri bo‘lib, uning eng kuchli versiyasi 570 kW yoki 764 ot kuchigacha quvvat ishlab chiqaradi. BYD Great Han, shuningdek, Dahan nomi bilan ham yuritilmoqda.
Avtomobilning uzunligi 5256 mm, kengligi 1999 mm, balandligi esa 1510 mmni tashkil etadi. G‘ildiraklar bazasi 3130 mmga teng. Taqqoslash uchun, bu ko‘rsatkichlar uni Mercedes-Benz S-Class’ning standart versiyasidan ham uzunroq qiladi.
Model tashqi dizayni BYD’ning Loong Face, ya’ni Dragon Face uslubida ishlangan. Sedan ingichka faralar, xrom bezakli old panel, faol havo kirish tizimi, yarim yashirin eshik tutqichlari va ko‘p spitsa shaklidagi disklar bilan jihozlangan. Orqa qismida esa Xitoy tuguni naqshiga ega yagona chiroq bloki qo‘llangan.
Avtomobil tomida LiDAR sensori joylashgan. Bu Great Han’da DiPilot haydovchiga ko‘maklashish tizimi bo‘lishini anglatadi. Ushbu tizim shahar ko‘chalari va magistral yo‘llarda Navigate On Autopilot funksiyasini qo‘llab-quvvatlashi kutilmoqda.
Great Han 20 yoki 21 dyuymli g‘ildiraklar bilan taklif etiladi. Avtomobilning jihozlanishiga qarab, og‘irligi 2210 kilogrammdan 2505 kilogrammgacha yetadi. To‘liq massasi esa 2660–2955 kilogramm oralig‘ida bo‘ladi.
Texnik imkoniyatlari
Elektromobilning boshlang‘ich versiyasi orqa o‘qda joylashgan bitta elektr motor bilan jihozlanadi. Ushbu motor 370 kW yoki 496 ot kuchi quvvat ishlab chiqaradi. Modelning maksimal tezligi 240 km/soatga yetadi. U LFP turidagi akkumulyator bilan jihozlanadi, biroq batareya sig‘imi hozircha e’lon qilinmagan.
Avvalgi ma’lumotlarga ko‘ra, orqa g‘ildirakdan tortuvchi BYD Great Han bir quvvatlanishda CLTC sikli bo‘yicha 1008 kilometrgacha yo‘l bosishi mumkin. To‘liq uzatmali versiyada umumiy quvvat 570 kW yoki 764 ot kuchiga yetadi. Ushbu modifikatsiyaning maksimal tezligi 270 km/soat, yurish zaxirasi esa 880 kilometrni tashkil etadi.
BYD Great Han’ning PHEV, ya’ni gibrid versiyasi ham ishlab chiqariladi. U 1,5 litrli turbo benzin dvigateli bilan jihozlanadi. Ushbu motor 115 kW yoki 154 ot kuchi quvvat beradi va 200 kW yoki 268 ot kuchiga ega elektr motor bilan birga ishlaydi.
Gibrid sedan 54,489 kWh sig‘imli LFP batareyaga ega bo‘ladi. Batareya og‘irligi 389 kilogrammni tashkil etadi. Great Han PHEV elektr rejimida 370 kilometrgacha harakatlana oladi. Batareya quvvati tugagan holatda yoqilg‘i sarfi 100 kilometrga 4,6 litr deb ko‘rsatilgan.
Kutilishicha, BYD Great Han texnologik jihatdan Great Tang SUV modeliga yaqin bo‘ladi. Great Tang‘da Flash Charging tezkor quvvatlash texnologiyasi, DiSus-A osmasi, ikki kamerali pnevmatik osma, klirensni sozlash imkoniyati va orqa g‘ildiraklarni burish tizimi mavjud.
Qaynoq24.uz BYD Sealion 08 elektromobili qanday ko‘rinishda chiqqani haqida yozgan edi.
