BYD tarkibidagi Denza brendi 23-iyun kuni Xitoy bozorida yangilangan Denza N8L plagin-gibrid SUV modelini sotuvga chiqaradi. Bu haqda CNC xabar berdi.
Olti o‘rindiqli yirik oilaviy krossoverning oldindan buyurtma narxi 350 ming yuandan 400 ming yuangacha belgilangan. Bu taxminan 51,7–59,1 ming dollarga teng. Denza N8L avval Xitoy bozorida 299 800 yuandan 329 800 yuangacha bo‘lgan narxda taklif etilgan.
Yangilangan Denza N8L’ning asosiy farqi — 75,26 kVt/soat sig‘imli LFP batareya. Ushbu akkumulyator CLTC sikli bo‘yicha 420 kilometrgacha elektr yurish zaxirasini ta’minlaydi. Taqqoslash uchun, hozirgi modifikatsiyada 46,99 kVt·soat sig‘imli ancha kichik batareya qo‘llaniladi.
Yangi batareya 800 voltli yuqori kuchlanishli tizimga ega. Shuningdek, avtomobil “flash charging” tezkor quvvatlanish texnologiyasini qo‘llab-quvvatlaydi. Kompaniya ma’lumotiga ko‘ra, ushbu texnologiya batareyani 10 foizdan 97 foizgacha atigi 9 daqiqada quvvatlash imkonini beradi.
Modelning texnik imkoniyatlari
Denza N8L plagin-gibrid kuch qurilmasi bilan jihozlangan. U 2,0 litrli turbomotor va uchta elektromotordan iborat. Tizimning umumiy maksimal quvvati 560 kVt, ya’ni 751 ot kuchiga yetadi. Bu ko‘rsatkich modelni oilaviy SUV bo‘lishiga qaramay, yuqori dinamikaga ega avtomobillar qatoriga kiritadi.
Krossover DiSus-A faol osma tizimi va orqa g‘ildiraklarni burish funksiyasiga ega. Shu sababli avtomobilning burilish radiusi 4,58 metrni tashkil etadi. Bu 5200 mm uzunlik, 1999 mm kenglik, 1820 mm balandlik va 3075 mm g‘ildirak bazasiga ega to‘liq o‘lchamli krossover uchun yaxshi natija hisoblanadi.
Salon olti o‘rindiqli 2+2+2 joylashuvga ega. Ikkinchi qatordagi alohida kapitan o‘rindiqlari isitish, ventilyatsiya va massaj funksiyalarini qo‘llab-quvvatlaydi. Old yo‘lovchi o‘rindig‘ida “zero-gravity” rejimi mavjud. Uchinchi qator o‘rindiqlari esa standart holatda isitish funksiyasi bilan ta’minlangan.
Old panelda ikki dona 13,2 dyuymli ekran, markazda esa katta 17,3 dyuymli monitor o‘rnatilgan. Bundan tashqari, avtomobil 50 dyuymli kengaytirilgan reallik funksiyasiga ega proyeksion displey bilan jihozlangan.
Tashqi ko‘rinish bo‘yicha yangilangan Denza N8L amaldagi modelga yaqin qolgan. Avtomobilda bo‘lingan faralar, yashirin eshik tutqichlari, tomdagi LiDAR sensori va cho‘zilgan orqa chiroqlar saqlab qolingan. Yangilangan versiyani yangi qora-qizil kuzov rangi hamda 20 dyuymli g‘ildirak disklari orqali ajratish mumkin bo‘ladi.
Qaynoq24.uz BYD Denza Z qachon chiqishi haqida yozgan edi.
