BYD’ning premium subbrendi Denza Xitoyda yangilangan BYD Denza N8L plug-in hybrid SUV modelini sotuvga chiqardi. Bu haqda CNC xabar berdi.
Avtomobil endi 430 km elektr yurish zaxirasi va 728 kVt quvvatli tezkor quvvatlash tizimi bilan taklif etiladi. Yangilangan Denza N8L ikki xil komplektatsiyada chiqarildi. Boshlang‘ich versiya 319 800 yuan, ya’ni taxminan 47,2 ming dollarga baholangan. Yuqori talqin narxi esa 349 800 yuan yoki 51,6 ming dollarni tashkil qiladi.
Denza N8L ilk bor 2025-yil oxirida Denza N9 modelining nisbatan arzonroq “qarindoshi” sifatida taqdim etilgan edi. O‘sha paytda olti o‘rindiqli SUV 2,0 litrli turbomotor asosidagi PHEV tizimi bilan jihozlangan va faqat 230 km elektr yurish zaxirasini taklif qilgan.
Yangi versiyada asosiy yangilik BYD’ning flash charging, ya’ni o‘ta tez quvvatlash texnologiyasi bo‘ldi. Denza ma’lumotiga ko‘ra, avtomobil doimiy tokda 728 kVtgacha quvvat bilan quvvatlana oladi. Batareya 10 foizdan 70 foizgacha 5 daqiqada, 10 foizdan 97 foizgacha esa 9 daqiqada to‘ldirilishi aytilmoqda. Hatto −30 °C sovuqda ham quvvatlash vaqti atigi 3 daqiqaga ko‘proq bo‘lishi qayd etilgan.
Bunga yangi 1000 voltli arxitektura va 75,26 kVt·soat sig‘imli LFP batareya orqali erishilgan. Avvalgi 46,99 kVt/soatli batareya bilan taqqoslaganda, sig‘im qariyb 60 foizga oshgan. Shu sababli CLTC sikli bo‘yicha elektr yurish zaxirasi 230 km dan 430 km gacha yetkazildi.
Yuqori komplektatsiyada 21 dyuymli disklar, elektr eshiklar, faol xavfsizlik kamar tortqichlari, ikkinchi qator uchun 17,3 dyuymli ekran va “nol gravitatsiya” old yo‘lovchi o‘rindig‘i mavjud. Shu bilan birga, yangilanish narxga ham ta’sir qilgan: 2025-yilda model 299 800 yuandan boshlanar edi, endi esa boshlang‘ich narx 20 ming yuanga oshgan.
Qo‘shimcha imkoniyatlar
Denza N8L uzunligi 5200 mm, eni 1999 mm, balandligi 1820 mmni tashkil qiladi. G‘ildiraklar bazasi 3075 mmga teng. Komplektatsiyaga qarab avtomobil vazni 2980 kg dan 3120 kg gacha boradi. Model old tomonda ikki richagli, orqada esa besh bo‘g‘inli ko‘p richagli osma tizim bilan jihozlangan.
SUV’da BYD’ning DiSus-A faol osmasi va orqa g‘ildiraklarni 10 darajagacha burish tizimi ham bor. Bu burilish radiusini 4,58 metrgacha qisqartiradi. Haydovchiga yordam tizimlari uchun DiPilot 300 majmuasi javob beradi. U tomdagi LiDAR, 3 ta millimetrli to‘lqin radari va 7 ta kamera bilan ishlaydi.
N8L BYD’ning e3 tri-motor PHEV platformasida qurilgan. Tizim 2,0 litrli benzinli dvigatel, old tomondagi bitta elektromotor va orqa tomondagi ikkita elektromotordan iborat. Benzinli motor 150 kVt yoki 202 ot kuchi beradi, umumiy quvvat esa 560 kVt, ya’ni 751 ot kuchiga teng.
Salon 2+2+2 o‘rindiq sxemasida ishlab chiqilgan. Birinchi va ikkinchi qator o‘rindiqlari isitish, ventilyatsiya va massaj funksiyalariga ega. Uchinchi qator esa isitish funksiyasi bilan jihozlangan. Old panelda 17,3 dyuymli multimedia ekrani, old yo‘lovchi uchun esa 13,2 dyuymli alohida ekran mavjud.
Qaynoq24.uz BYD Seal 08 elektromobili dilerlarga kelgani haqida yozgan edi.
