Meta kompaniyasi Meta Glasses nomli yangi smart ko‘zoynaklar liniyasini taqdim etdi. Qurilma 299 dollardan sotiladi va avvalgi Meta Ray-Ban smart ko‘zoynaklarining bazaviy modelidan kamida 80 dollarga arzonroq bo‘ladi.
Yangi ko‘zoynaklar avvalgi avlod singari Ray-Ban’ning bosh kompaniyasi EssilorLuxottica bilan hamkorlikda yaratilgan. Biroq bu safar mahsulot Ray-Ban yoki Oakley brendi ostida chiqarilmaydi.
Meta Glasses uch xil dizaynda taklif etiladi: to‘g‘ri burchakli, kvadrat va oval shakldagi modellarga retsept bo‘yicha linza o‘rnatish mumkin. Bundan tashqari, amerikalik model Kayli Jenner bilan hamkorlikda ingichka oval romli alohida kolleksiya ham ishlab chiqilgan.
Ko‘zoynaklarda ekran yo‘q, biroq ular kamera va shaxsiy dinamiklar bilan jihozlangan. Qurilma yordamida foydalanuvchilar suratga olish, video yozish va ovozli buyruqlar orqali turli funksiyalardan foydalanishi mumkin.
Yangi model Meta’ning integratsiyalashgan sun’iy intellekt yordamchisi bilan bozorga chiqayotgan ilk smart ko‘zoynaklaridan biri bo‘ldi. Reuters ma’lumotiga ko‘ra, Meta AI yordamchisi Muse Spark til modeli asosida ishlaydi.
Foydalanuvchilar Meta AI bilan ovoz orqali muloqot qilishi mumkin. Masalan, ko‘zoynak atrofdagi obyektlarni tanib berishi, foydalanuvchi ko‘rayotgan narsalarni izohlashi yoki tarjima qilishi mumkin.
Meta Glasses AQSh, Kanada, Buyuk Britaniya, Fransiya, Italiya, Germaniya, Ispaniya va boshqa Yevropa mamlakatlarida sotuvga chiqariladi. Kompaniya yil oxirigacha savdo geografiyasi va rasmiy riteylerlar ro‘yxatini kengaytirishni rejalashtirmoqda.
Meta rahbariyati smart ko‘zoynaklarni kelajakdagi hisoblash qurilmalari yo‘nalishlaridan biri sifatida ko‘rmoqda. Avvalroq kompaniya linzalarida displey bo‘lgan Ray-Ban Display nomli 799 dollarlik ko‘zoynakni ham e’lon qilgan edi, biroq uning sotuvga chiqarilishi haqida hozircha ma’lumot berilmagan.
Qaynoq24.uz Meta 25 mlrd dollargacha obligatsiya chiqarishni rejalashtirayotgani haqida yozgan edi.
