Huawei kompaniyasi flagman smartfonlar bozorida yil davomida bir nechta premium qurilmalarni bosqichma-bosqich chiqarish strategiyasini davom ettirmoqda. Insayder @RuryRen ma’lumotiga ko‘ra, Huawei Mate 90 seriyasi 2026-yil sentabr oyida taqdim etilishi kutilmoqda.
Bu muddat so‘nggi Mate avlodlari uchun odatiy bo‘lgan noyabr oyidan biroz ertaroq hisoblanadi. Bunday qaror Huawei yangi flagmanlar tayyorgarligiga ishonch bilan qarayotganini anglatishi mumkin. Sentabr oyi smartfon bozorida eng faol davrlardan biri bo‘lib, bu vaqtda Apple’ning yangi iPhone modellari ham taqdim etilishi kutiladi.
Insayderning bildirishicha, Huawei iyul-avgust oylarida yana ayrim yangi modellarni ham chiqarishi mumkin. Biroq ularning aniq nomlari hozircha ochiqlanmagan. Shu bilan birga, avvalroq mish-mishlarda tilga olingan Pura 90s seriyasi bekor qilingani aytilmoqda.
Huawei 2026-yil boshida Pura 90 seriyasini taqdim etgan edi. Pura 90 Pro va Pura 90 Pro Max aprel oyida yangi Kirin 9030S protsessoriga ega ilk smartfonlar sifatida chiqarildi. Keyinroq, 8-may kuni Kirin 9010S chipi bilan jihozlangan oddiy Pura 90 modeli ham sotuvga chiqdi.
Mate 90 seriyasi ushbu yo‘nalishdagi keyingi yirik qadam bo‘lishi kutilmoqda. Yangi flagmanlarda yanada takomillashtirilgan chipset, energiya samaradorligi, kuchaytirilgan sun’iy intellekt imkoniyatlari va HarmonyOS bilan chuqurroq integratsiya bo‘lishi mumkin.
Huawei’ning yil davomida bir nechta premium qurilmalarni chiqarish strategiyasi kompaniyaga bozordagi faollikni saqlab turish imkonini beradi. Iyul-avgust oylarida chiqishi kutilayotgan modellar Mate 90 seriyasi oldidan oraliq yangilik vazifasini bajarishi, sentabrdagi Mate 90 esa kompaniyaning yil yakunidagi asosiy flagman taklifiga aylanishi mumkin.
Qaynoq24.uz Huawei nova Y74 katta akkumulator bilan taqdim etilgani haqida yozgan edi.
