Vivo X500 Pro Max smartfonining kamera tizimi haqida yangi tafsilotlar paydo bo‘ldi. Bu haqda Gizmochina xabar berdi.
Insayder Digital Chat Station qurilmaning muhandislik namunasi 50 MP + 50 MP + 200 MP kameralar kombinatsiyasi bilan sinovdan o‘tayotganini ma’lum qildi. Ma’lumotlarga ko‘ra, Vivo X500 seriyasi sentabr oyida taqdim etilishi mumkin. Bu yil lineykaga yangi Vivo X500 Pro Max modeli ham qo‘shilishi kutilmoqda.
Yangi ma’lumotlarda smartfonning asosiy kamerasi 50 megapikselli Sony LOFIC sensori bo‘lishi aytilmoqda. Sensor o‘lchami 1/1,28 dyuymni tashkil etadi. Insayder aniq sensor nomini ochiqlamagan. Biroq u Sony’ning yangi LYT-838 sensori bo‘lishi mumkinligi taxmin qilinmoqda.
LOFIC texnologiyasi murakkab yorug‘lik sharoitida tasvir sifatini yaxshilashga yordam beradi. Bu ayniqsa kontrast kuchli bo‘lgan sahnalarda dinamik diapazonni kengaytirishi mumkin. Telefoto kamera esa 200 megapikselli periskop modul bo‘lishi kutilmoqda. U 1/1,4 dyuymli yirik sensor bilan jihozlanishi mumkin.
Bunday sensor zum orqali suratga olishda sezilarli ustunlik berishi aytilmoqda. Shuningdek, u past yorug‘likda ham sifatliroq kadr olishga yordam berishi mumkin. Ultra keng burchakli kamera bo‘yicha ham sinovlar davom etmoqda. Vivo 50 megapikselli IMX8 seriyali o‘rta o‘lchamdagi sensorni sinab ko‘rayotgani aytilmoqda.
Shu bilan birga, kompaniya kichikroq 50 megapikselli sensor variantini ham ko‘rib chiqmoqda. Qurilma hali test bosqichida bo‘lgani uchun yakuniy kamera xususiyatlari o‘zgarishi mumkin. Vivo X500 Pro Max 2 nm texnologiya asosidagi Dimensity 9600 seriyali chip bilan chiqishi kutilmoqda. Bu uni keyingi avlod Android flagmanlari qatoriga olib chiqishi mumkin.
Smartfon old tomonida BOE ishlab chiqargan 6,85 dyuymli tekis ekran bo‘lishi aytilmoqda. Displey LIPO texnologiyasi, 2K aniqlik va 144 Hz yangilanish chastotasini qo‘llab-quvvatlashi mumkin.
Batareya sig‘imi taxminan 8000 mA/soat bo‘lishi kutilmoqda. Biroq quvvatlash tezligi haqida hozircha ma’lumot berilmagan. Dasturiy ta’minot tomondan Vivo X500 Pro Max Android 17 asosidagi OriginOS 7 bilan chiqishi mumkin.
Qaynoq24.uz Vivo X500 Ultra 10 karra optik zum olishi mumkinligi haqida yozgan edi.
