Vivo X300e Snapdragon 8 Gen 5 va 7100 mA/soat batareya olishi mumkin. Bu haqda Gizmochina nashri xabar berdi.
Ma’lumotlarga ko‘ra, Vivo X300e 6,59 dyuymli 1,5K aniqlikdagi OLED displey bilan jihozlanadi. Ekran tekis panel dizaynida bo‘lishi kutilmoqda. Smartfon Qualcomm’ning Snapdragon 8 Gen 5 chipida ishlashi aytilmoqda. Xuddi shu platforma Vivo X300 FE modelida ham qo‘llanishi mumkin.
Qurilmaning old tomonida 50 megapikselli selfi kamera bo‘lishi kutilmoqda. Orqa kamera tizimi esa 50 megapikselli asosiy sensor, 8 megapikselli ultra keng burchakli modul va zoom uchun 50 megapikselli Sony IMX8 periskop kameradan iborat bo‘lishi mumkin. X seriyasiga xos tarzda kameralar Zeiss tasvir sozlamalari bilan kelishi aytilmoqda. Bu rang aniqligi va optik sifatni yaxshilashga xizmat qiladi.
Vivo X300e’ning eng muhim jihatlaridan biri katta akkumulyator bo‘lishi mumkin. Insayderga ko‘ra, smartfon 7015 yoki 7100 mA/soat sig‘imli batareya bilan jihozlanadi. Shuningdek, 90 Vt tezkor quvvatlash qo‘llab-quvvatlanadi. Bunday sig‘imga qaramay, qurilma qalinligi 7,99 mm, vazni esa taxminan 203 gramm bo‘lishi kutilmoqda.
Dizayn borasida smartfon chap tomonda joylashgan kvadrat kamera blokiga ega bo‘lishi aytilmoqda. Korpus metall ramka bilan o‘raladi. Bundan tashqari, qurilmada ultratovushli barmoq izi skaneri bo‘lishi ehtimoli bor, biroq bu ma’lumot hozircha to‘liq tasdiqlanmagan.
Vivo X300e taqdimot sanasi hozircha ma’lum emas. Kompaniya smartfon haqida rasmiy bayonot bermagan, shu bois tarqalgan ma’lumotlarga hozircha insayderlik xabari sifatida qaralmoqda.
Qaynoq24.uz Vivo X500 uchta kamera va 7500 mA/soat batareya bilan chiqishi mumkinligi haqida yozgan edi.
