UzAuto Motors yangi Damas 3 modelini xaridorlarga topshira boshladi. Kompaniya uni ichki nom bilan Damas Move va Damas Max deb atamoqda.
Mashinalar zavoddan maxsus transport plyonkasida chiqarilmoqda. Bu usul ilgari Malibu va Tahoe kabi modellarda ham qo‘llangan. Yangi Damas ishlab chiqarilishi prezident topshirig‘i asosida Xorazm viloyatidagi Pitnak filialida yo‘lga qo‘yilgan. Kompaniya eski Damas modelini ishlab chiqarishdan olib tashlamasligini ma’lum qildi.
Aslida yangi Damas Xitoyda ishlab chiqariladigan Wuling Hongguang V modeliga asoslangan. U Meksika bozorida Chevrolet Tornado Van nomi bilan sotiladi. Modelda Chevrolet belgisi bo‘lsa-da, uning muhandislik yechimlari asosan Wuling kompaniyasiga tegishli. Xitoyda ushbu avtomobil $6,4 mingdan $8,4 minggacha sotiladi. O‘zbekistonda esa shu model $11 mingdan $13 minggacha baholanmoqda. Narx farqi 40 foizdan 60 foizgacha yetmoqda.
Yangi Damas ikki asosiy turda taklif etilmoqda. Max versiyasi yuk tashish uchun mo‘ljallangan furgon hisoblanadi. Move esa yo‘lovchi tashishga mo‘ljallangan model bo‘lib, 7 yoki 8 o‘rinli variantlarga ega. Har ikkala model 1,2 litr va 1,5 litrli atmosfera dvigatellar bilan taklif etiladi. 1,2 litrli motor 81 ot kuchi beradi. 1,5 litrli motor esa 103 ot kuchiga ega. Ular mos ravishda 5 pog‘onali va 6 pog‘onali mexanik uzatmalar bilan ishlaydi.
Yangi Damas narxi 134,4 mln so‘mdan boshlanadi. Eng qimmat komplektatsiya esa 154,1 mln so‘mga yetadi. Barcha versiyalarda ABS, EBD, rul kuchaytirgichi va ikki xavfsizlik yostig‘i mavjud.
Shu bilan birga, eski Damas modeli narxi ham tushirildi. Pasayish barcha versiyalarda 5 mln so‘mni tashkil etdi. Masalan, yo‘lovchi Damas endi 91,9 mln so‘mga tushdi. Yuk tashuvchi versiya esa 88,1 mln so‘mdan sotilmoqda.
Yangi modelning paydo bo‘lishi fonida narxlarning tushirilishi bozorni muvozanatlashga qaratilgan qaror sifatida baholanmoqda.
Qaynoq24.uz yangi Damas taqdim etilgani haqida yozgan edi.
