Abduqodir Husanov O‘zbekiston futboli tarixida yangi sahifa ochdi. U «Manchester Siti» safida Angliya kubogini qo‘lga kiritgan ilk o‘zbekistonlik futbolchiga aylandi.
Finalda «Manchester Siti» «Chelsi»ni 1:0 hisobida mag‘lub etdi. Uchrashuv 16-may kuni Londondagi «Uembli» stadionida bo‘lib o‘tdi. G‘alaba golini Antuan Semenyo kiritdi.
Husanov bahsni asosiy tarkibda boshladi va to‘liq o‘ynadi. O‘zbekiston terma jamoasi himoyachisi himoyada ishonchli harakat qildi. U bir necha muhim yakkakurashlarda g‘alaba qozondi. 56-daqiqada esa sariq kartochka oldi. Birinchi bo‘limda «Manchester Siti» to‘p nazoratida ustunlik qildi. Pep Gvardiola jamoasi raqib jarima maydoniga bosim o‘tkazdi. «Chelsi» esa asosan qarshi hujumlar orqali javob qaytardi.
Tanaffusgacha Erling Holann hisobni ochishi mumkin edi. Ammo Robert Sanches uning zarbasini qaytardi. Londonliklar safida Koul Palmer va Enso Fernandes o‘yinni tezlashtirishga urindi.
Ikkinchi bo‘limda uchrashuv sur’ati oshdi. «Chelsi» bir necha xavfli vaziyat yaratdi. Ammo «Siti» himoyasi xatoga yo‘l qo‘ymadi. Uchrashuv taqdirini 72-daqiqadagi vaziyat hal qildi. Holann o‘ng qanotdan jarima maydoniga uzatma berdi. Semenyo esa to‘pni tovoni bilan darvozaga yo‘lladi.
Shundan keyin «Chelsi» oldinga katta kuch tashladi. Palmer, Pedru Netu va Enso Fernandes hujumlarda faol bo‘ldi. Ammo «Manchester Siti» minimal ustunlikni saqlab qoldi. Shu tariqa «Manchester Siti» Angliya kubogini sakkizinchi bor qo‘lga kiritdi. Jamoa bu mavsum Liga kubogidan keyin yana bir sovringa ega chiqdi.
Qaynoq24.uz Husanov “Manchester Siti”ning eng yaxshi o‘yinchisi bo‘lishi mumkinligi haqida yozgan edi.
