Kreml matbuot kotibi Dmitry Peskov Rossiya prezidenti Vladimir Putin Ukraina rahbari Volodimir Zelenskiy bilan uchrashuvga tayyor ekanini ma’lum qildi.
Uning aytishicha, bunday uchrashuv faqat bitta maqsad uchun o‘tkazilishi mumkin. Ya’ni tinchlik kelishuvini yakunlash uchun.
“Putin Moskvada istalgan vaqtda uchrashishga tayyor. Asosiysi — uchrashuvdan maqsad bo‘lishi va u natijali bo‘lishi kerak”, — dedi Peskov.
Kreml vakili avval ham Ukrainada tinchlik jarayoni Zelenskiy zimmasiga mas’uliyat olish bilan bog‘liq ekanini ta’kidlagan edi. Ukraina prezidenti esa uchrashuv o‘tkazilishi mumkin bo‘lgan joylar haqida gapirdi. Uning so‘zlariga ko‘ra, muzokaralar Yaqin Sharq, Yevropa yoki AQShda o‘tkazilishi mumkin.
Zelenskiy har qanday formatda uchrashuvga tayyorligini bildirgan. U asosiy maqsad tinchlik ekanini ta’kidladi.
“Bizga tinchlik kerak. Biz tinchlik uchun hamma narsani qilamiz”, — dedi Zelenskiy.
Shu bilan birga, Ukraina tomoni muzokaralar hozircha kechiktirilganini aytmoqda. Bunga AQSh va Eron o‘rtasidagi harbiy keskinlik sabab sifatida ko‘rsatilgan. Rossiya siyosatchilari esa Zelenskiy bayonotlariga shubha bilan qaramoqda. Ularning fikricha, Kiyev tomoni muzokaralarni cho‘zishga harakat qilmoqda.
Ayrim deputatlar muzokaralar faqat uchinchi tomon orqali olib borilishi mumkinligini aytmoqda. Bu jarayonda AQSh asosiy vositachi bo‘lishi mumkinligi qayd etilmoqda. Hozircha tomonlar o‘rtasida to‘g‘ridan-to‘g‘ri uchrashuv sanasi belgilanmagan. Vaziyat noaniq qolmoqda.
Qaynoq24.uz Rossiyaning Saratov shahrida kuchli portlash yuz bergani haqida yozgan edi.
