Realme Narzo 100x smartfoni taqdim etildi

Realme kompaniyasi tomonidan Hindistonda Realme Narzo 100x smartfoni taqdim etildi. Bu haqda Gizmochina nashri xabar bermoqda.

Qurilmaning asosiy xususiyati kompaniya «Titan Battery» deb atayotgan 8000 mA/soatli batareyadir. Realme’ning ta’kidlashicha, smartfon bir marta quvvatlanganda uch kungacha ishlashi mumkin. Batareya 1600 tagacha quvvatlash siklini qo‘llab-quvvatlaydi va to‘rt yillik foydalanishdan keyin ham dastlabki sig‘imining 80 foizdan ortig‘ini saqlab qolishi aytilmoqda.

Smartfon 45 vattli tezkor quvvatlash texnologiyasiga ega. Bundan tashqari, qurilma orqali boshqa gadjetlarni 27 vatt quvvat bilan simli ravishda quvvatlash mumkin. O‘yin vaqtida batareyani chetlab o‘tib, energiyani to‘g‘ridan to‘g‘ri smartfonga uzatadigan bypass charging funksiyasi ham mavjud. Bu usul uzoq davom etadigan o‘yin seanslarida qurilmaning kamroq qizishiga yordam beradi. Katta batareyaga qaramay, smartfon korpusining qalinligi 8,8 millimetr, og‘irligi esa 224 grammni tashkil etadi.

Realme Narzo 100x 5G modeliga 6,8 dyuymli HD+ LCD ekran o‘rnatilgan. Displey 144 Gts yangilanish chastotasi va 1200 nitgacha maksimal yorqinlikni qo‘llab-quvvatlaydi. Yuqori yangilanish chastotasi tasvirlarning silliq namoyish etilishini ta’minlasa-da, ekranning HD+ aniqligi qurilmaning ayrim raqobatchilariga nisbatan kamtarroq ko‘rsatkich hisoblanadi.

Smartfon MediaTek Dimensity 6300 protsessorida ishlaydi. U LPDDR4X tezkor xotira va UFS 2.2 ichki xotirasi bilan taklif etiladi. O‘yinlar yoki katta yuklama vaqtida haroratni nazorat qilish uchun qurilmaga 5300 kvadrat millimetrli bug‘ kamerasi asosidagi sovitish tizimi joylashtirilgan.

Qo‘shimcha imkoniyatlar

Narzo 100x 5G‘ning orqa tomonida 50 megapikselli asosiy kamera mavjud. Selfi va videoqo‘ng‘iroqlar uchun old tomonga 8 megapikselli kamera o‘rnatilgan. Qurilma Android 16 operatsion tizimi asosidagi Realme UI 7.0 interfeysida ishlaydi.

Smartfonning orqa panelida bildirishnomalar haqida yorug‘lik orqali xabar beruvchi AI Pulse Light funksiyasi mavjud. Model IP65 standarti bo‘yicha chang va suv sachrashidan himoyalangan. Aloqa imkoniyatlari qatoridan Wi-Fi 5 va Bluetooth 5.3 o‘rin olgan.

Realme Narzo 100x 5G‘ning 4 GB tezkor va 128 GB ichki xotirali versiyasi 20 999 rupiyga baholangan. 6/128 GB konfiguratsiya 22 999 rupiy, 6/256 GB varianti esa 24 999 rupiy turadi. Smartfon Midnight Black qora va Flash Orange to‘q sariq ranglarda sotuvga chiqariladi.