Redmi kompaniyasi Redmi Turbo 6 smartfonlari seriyasi ustida ishlamoqda. Bu haqda Gizmochina nashri xabar berdi.
Yangi qator standart Redmi Turbo 6 va kuchliroq Turbo 6 Max modellaridan iborat bo‘lishi kutilmoqda. Smart Pikachu taxallusi bilan tanilgan insayder ma’lumotiga ko‘ra, qurilmalar katta ekran, sig‘imi yuqori akkumulyator va MediaTek’ning yangi protsessorlari bilan jihozlanadi.
Redmi Turbo 6 seriyasidagi smartfonlar 7 dyuymli displey va 10 000 mA/soat sig‘imli batareyaga ega bo‘lishi mumkin. Bunday akkumulyator qurilmaning bir quvvatlashda uzoq vaqt ishlashini ta’minlashi kutilmoqda. Hozircha tezkor quvvatlash quvvati haqida ma’lumot berilmagan.
Standart Redmi Turbo 6 modeliga Dimensity 8 turkumiga mansub protsessor o‘rnatilishi aytilmoqda. Gap TSMC’ning 3 nanometrli texnologiyasi asosida ishlab chiqarilishi kutilayotgan MediaTek Dimensity 8600 chipi haqida borishi mumkin. Ushbu protsessor hali rasman taqdim etilmagan.
Turbo 6 Max esa Dimensity 9 turkumidagi kuchliroq chip bilan jihozlanishi mumkin. Manbalarga ko‘ra, bu hali rasman tasdiqlanmagan Dimensity 9600s protsessori bo‘ladi. Avvalgi ma’lumotlarda Max versiyasi 2K aniqlikdagi displey olishi ham aytilgan edi.
Qurilmada ekran ostiga o‘rnatilgan ultratovushli barmoq izi skaneri, metall o‘rta ramka hamda IP68 va IP69 standartlari bo‘yicha chang va suvdan himoya ko‘zda tutilishi mumkin. IP69 sertifikati smartfonning yuqori bosim va haroratdagi suv oqimlariga ham bardosh bera olishini anglatadi.
Turbo 6 Max 2027-yil yanvarida taqdim etilishi kutilmoqda. Oddiy Turbo 6 modeli ham shu tadbirda namoyish qilinadimi yoki keyinroq chiqariladimi, hozircha noma’lum. Redmi yangi seriyaning texnik xususiyatlari va taqdimot muddatini rasman tasdiqlamagan.
Qaynoq24.uz Redmi 17C 5G Dimensity 6300 chipi bilan chiqishi haqida yozgan edi.
