Samsung Galaxy S26 Ultra smartfonida maxfiylik alohida bitta funksiya sifatida emas, balki bir necha himoya qatlamidan iborat tizim sifatida ishlaydi. Smartfonda ekrandagi ma’lumotlarni begona ko‘zlardan yashirish, qurilmadagi muhim ma’lumotlarni alohida saqlash hamda shaxsiy fayl va ilovalarni telefonning qolgan qismidan ajratish imkoniyatlari mavjud.
Galaxy S26 Ultra’dagi eng e’tiborli yangiliklardan biri Privacy Display texnologiyasidir. Bu funksiya yoqilganda ekran ko‘rish burchagi torayadi va undagi ma’lumotlar asosan faqat foydalanuvchining o‘ziga ko‘rinadi. Masalan, poyezdda, kafeda yoki yig‘ilishda yoningizda o‘tirgan odamlar ekraningizdagi xabar, bank ilovasi yoki boshqa shaxsiy ma’lumotlarni o‘qiy olmaydi.
Privacy Display oddiy himoya plyonkasi emas, balki ekranning o‘ziga integratsiya qilingan texnologiya hisoblanadi. Shu sababli u tasvir sifatini pasaytirmaydi va qurilmani qalinlashtirmaydi. Foydalanuvchi uni qo‘lda yoqishi yoki ayrim holatlarda avtomatik faollashadigan qilib sozlashi mumkin. Masalan, bank ilovasi ochilganda, PIN-kod kiritilganda yoki bildirishnoma kelganda funksiya o‘zi ishga tushadi. Bundan tashqari, yanada tor ko‘rish burchagini ta’minlaydigan Maximum Privacy Protection rejimi ham mavjud.
Galaxy S26 Ultra’dagi maxfiylik tizimining asosi Samsung Knox platformasidir. Knox smartfonning chip darajasiga o‘rnatilgan bo‘lib, qurilma yoqilgan zahoti himoya ishga tushadi. U telefon ishga tushayotganda tizimga begona aralashuv bo‘lmaganini tekshiradi va fon rejimida shubhali faollikni kuzatib boradi.
Farqlari qanday
Samsung Knox’ning oddiy Android xavfsizlik tizimidan farqi shundaki, u bir vaqtning o‘zida ham apparat, ham dasturiy ta’minot darajasida ishlaydi. Agar himoyaning bir qatlami xavf ostida qolsa ham, boshqa qatlamlar ishlashda davom etadi. Foydalanuvchi buni har doim sezmasligi mumkin, ammo qurilma doimiy ravishda bir nechta himoya chizig‘i orqali ma’lumotlarni saqlaydi.
Smartfonda Knox Vault texnologiyasi ham bor. Bu qurilmaning asosiy tizimidan jismonan ajratilgan maxsus xavfsiz hudud bo‘lib, unda parollar, biometrik ma’lumotlar va shifrlash kalitlari saqlanadi. Knox Vault o‘z protsessori va xotirasiga ega, shu sababli u asosiy operatsion tizimdan alohida ishlaydi.
Agar telefonning asosiy tizimiga zararli dastur yoki boshqa xavf ta’sir qilsa ham, Knox Vault ichidagi ma’lumotlar himoyalangan holda qoladi. Barmoq izi va yuzni tanish ma’lumotlari Samsung serverlariga yuborilmaydi va ilovalar ularga kira olmaydi. Tekshiruv jarayoni to‘liq qurilmaning o‘zida amalga oshiriladi.
Galaxy S26 Ultra’da KEEP texnologiyasi ham qo‘llangan. Bu Knox Enhanced Encrypted Protection degan nomning qisqartmasi bo‘lib, har bir ilova uchun alohida shifrlangan saqlash maydonini yaratadi. Natijada ilovalar faqat o‘z ma’lumotlariga kira oladi va boshqa ilovalar ma’lumotlariga aralasha olmaydi.
Bu ayniqsa Galaxy AI funksiyalari uchun muhim. Chunki sun’iy intellekt asosidagi ayrim imkoniyatlar taqvim, xabarlar yoki Samsung Health ilovasidagi ma’lumotlardan foydalanib, shaxsiy tavsiyalar va qisqa xulosalar tayyorlashi mumkin. KEEP esa bir joyda qayta ishlangan ma’lumot boshqa ilova yoki jarayonga chiqib ketmasligini ta’minlaydi.
Fayllar almashinuvi
Shaxsiy fayl va ilovalarni himoya qilish uchun Secure Folder funksiyasi ham mavjud. U telefonda alohida shifrlangan hudud yaratadi. Bu joyga joylashtirilgan ilovalar, fayllar va boshqa ma’lumotlar asosiy tizimdan ajratiladi. Ular oddiy ilovalar ro‘yxatida yoki galereyada ko‘rinmaydi.
Secure Folder ichida ayrim ilovalarning ikkinchi nusxasini ham ishlatish mumkin. Masalan, foydalanuvchi WhatsApp’ning alohida akkauntini Secure Folder ichida yuritishi va uni asosiy ilovadan mustaqil saqlashi mumkin.
Surat va videolarni yashirish uchun esa Private Album funksiyasi taklif etiladi. Bu Secure Folder’ga qaraganda soddaroq yechim bo‘lib, tanlangan surat va videolarni galereyaning asosiy qismidan yashiradi. Foydalanuvchi alohida shifrlangan papka yaratmasdan ham ayrim shaxsiy rasmlarni boshqalardan berkitishi mumkin.
Galaxy S26 Ultra’da Auto Blocker funksiyasi ham bor. U rasmiy ilovalar do‘konidan tashqaridagi manbalardan dastur o‘rnatilishini cheklaydi. Android qurilmalariga zararli dasturlar ko‘pincha aynan norasmiy manbalardan yuklangan ilovalar orqali tushadi. Auto Blocker esa bunday xavfni kamaytiradi.
Ushbu funksiyani telefonni ilk bor sozlash paytidayoq yoqish mumkin. Agar foydalanuvchi odatda ilovalarni tashqi manbalardan o‘rnatmasa, Auto Blocker qurilmaga qo‘shimcha xavfsizlik beradi. Ilovalarni qo‘lda o‘rnatadigan foydalanuvchilar esa uni xavfsizlik sozlamalari orqali o‘chirishi mumkin.
Qaynoq24.uz Samsung Galaxy A27 smartfonining narxi oshishi haqida yozgan edi.
