Redmi Turbo 5 smartfoni va uning Hindistondagi taqdimoti oldidan asosiy xususiyatlari ma’lum bo‘ldi. Qurilma 16-iyun kuni rasman namoyish etilishi kutilmoqda. Bu haqda Gizmochina xabar bermoqda.
Amazon’da smartfon uchun maxsus sahifa ishga tushirildi. Unda Redmi Turbo 5’ning ayrim texnik imkoniyatlari ochiqlangan. Rasmiy reklama materiallariga ko‘ra, Redmi Turbo 5 7540 mA/soat sig‘imli batareya bilan jihozlanadi. Qurilma 100 W HyperCharge tezkor quvvatlash texnologiyasini qo‘llab-quvvatlaydi.
Bu jihat Xitoy versiyasidan biroz farq qiladi. Chunki Xitoy bozoridagi model 7560 mA/soat batareyaga ega. Farq atigi 20 mA/soatni tashkil qiladi va kundalik foydalanishda sezilarli ta’sir ko‘rsatmasligi mumkin.
Smartfon old tomonida 1.5K aniqlikdagi 120 Hz ekran joylashadi. Selfi va videoqo‘ng‘iroqlar uchun 20 MP old kamera o‘rnatiladi. Orqa tomonda 50 MP asosiy kamera bo‘ladi. U optik va elektron stabilizatsiyani qo‘llab-quvvatlaydi. Shuningdek, 8 MP ultra keng burchakli kamera ham mavjud bo‘ladi.
Redmi Turbo 5 MediaTek Dimensity 8500 chipi asosida ishlaydi. Qurilma 12 GBgacha LPDDR5X Ultra tezkor xotira va UFS 4.1 xotira bilan taklif etiladi.
Biroq LPDDR5X Ultra xotira faqat yuqori konfiguratsiyada mavjud bo‘ladi. Oddiy versiyalarda boshqa xotira turi qo‘llanishi mumkin.
Smartfonda ekran ostiga joylashtirilgan barmoq izi skaneri ham bo‘lishi kutilmoqda. Shuningdek, ikki dinamik, X o‘qi bo‘yicha chiziqli vibratsiya motori va infraqizil port ham tilga olinmoqda.
Qurilma metall o‘rta ramka bilan jihozlanadi. Bundan tashqari, IP68 va IP69 standarti bo‘yicha chang hamda suvdan himoya mavjud bo‘lishi kutilmoqda.
Redmi yaqin kunlarda smartfon narxi, sotuvga chiqish sanasi va konfiguratsiyalari haqida qo‘shimcha ma’lumot berishi mumkin.
Ayrim xabarlarga ko‘ra, kompaniya Redmi Turbo 5 bilan birga Redmi 17 modelini ham namoyish qilishi mumkin. Biroq bu ma’lumot hozircha rasman tasdiqlanmagan.
Qaynoq24.uz Redmi K100 Pro smartfoni 9000 mA/soat batareya bilan chiqishi haqida yozgan edi.
