Toshkent shahrida Yunusobod tumani soliq inspeksiyasining ikki nafar inspektoriga nisbatan jinoyat ishi qo‘zg‘atildi. Bu haqda Davlat xavfsizlik xizmati xabar berdi.
Holat DXX Call-markaziga kelib tushgan murojaat asosida aniqlangan. Shundan so‘ng DXXning Toshkent shahar bo‘yicha boshqarmasi va Iqtisodiy jinoyatlarga qarshi kurashish departamenti xodimlari hamkorligida tezkor tadbir o‘tkazilgan.
Ma’lumotlarga ko‘ra, ikki inspektor o‘zaro til biriktirgan. Ular xizmat mavqeidan foydalanib, tadbirkorga “Chilonzor buyum bozori kompleksi” AJdan uchta savdo do‘konini ijaraga olishda yordam berishni va’da qilgan.
Soliq inspektorlari tanishlari orqali tadbirkorga tegishli MChJni ochiq savdo tenderida g‘olib qilishni aytgan. Shuningdek, do‘konlarni ijaraga olish bo‘yicha shartnomalarni rasmiylashtirib berishni va’da qilishgan.
Buning evaziga ular tadbirkordan $5 ming talab qilgan. Tezkor tadbir davomida inspektorlar so‘ralgan pulni olayotgan vaqtda ashyoviy dalillar bilan ushlangan. Hozirda ularga nisbatan jinoyat ishi qo‘zg‘atildi. Tergov harakatlari olib borilmoqda.
Qaynoq24.uz «Soliq Mobile» orqali 3,2 mlrd so‘m talon-toroj qilinganlar aniqlangani haqida yozgan edi.
