Toyota Yaponiyada noodatiy Toyota Camry loyihasini taqdim etdi. Sedan 7 silindrli kuch qurilmasi va taxminan 700 ot kuchiga ega.
Avtomobil Yaponiyadagi “Fuji Speedway” avtodromida o‘tgan Super Taikyu poyga marafoni doirasida namoyish qilindi. Toyota tadbirda Camry asosidagi ikkita maxsus tyuning loyihasini ko‘rsatdi.
Ushbu shou-karlar Camry sedanining Yaponiya bozoriga qaytishi bilan bog‘liq holda tayyorlangan. Model mamlakatga mahalliy zavodlardan emas, balki AQShning Kentukki shtatidan yetkazib beriladi.
Birinchi loyiha Gazoo Racing atelyesi tomonidan ishlab chiqildi. Mutaxassislar Camry’ga sport uslubidagi kuzov to‘plami, kengaytirilgan qanotlar va katta orqa antikryl o‘rnatdi. Shuningdek, osma va tormoz tizimlari qayta sozlandi.
Model yirikroq disklar va past profilli shinalar bilan jihozlandi. Biroq avtomobilning eng asosiy jihati tashqi dizaynda emas, balki kuch qurilmasida. Gazoo Racing yaratgan Camry’da ikkita benzin dvigateli o‘rnatilgan. Old qismda GR Yaris va GR Corolla modellaridan tanish 3 silindrli G16E-GTS motor joylashgan. Orqa o‘rindiqlar o‘rniga esa 4 silindrli yangi 20E turbo dvigatel o‘rnatilgan.
Texnik imkoniyatlar
Shu tariqa avtomobil jami 7 silindrli kuch qurilmasiga ega bo‘ldi. Motorlar old va orqa o‘qlarni alohida harakatga keltiradi. Ular maxsus mexanik uzatma orqali sinxron ishlaydi. Ikkinchi Camry loyihasi Toyota Racing muhandislari tomonidan tayyorlandi. U bosodzoku uslubida bajarilgan. Bu uslub 1970-yillarda shakllangan yapon mototsikl submadaniyatiga ishora qiladi.
Ushbu sedan juda agressiv kuzov to‘plami, past klirens va uzun chiqarish quvurlari bilan ajralib turadi. Salonda esa old paneldagi mo‘ynali qoplama, markaziy konsoldagi billur kuldon va 1980-yillar uslubidagi raqamli panel qo‘llangan.
Shuningdek, uzatma dastagi muzli viski stakanini eslatadigan shaklda tayyorlangan. Mualliflar fikricha, interyer Kentukki shtati bilan bog‘liq tasavvur uyg‘otishi kerak. Ikkinchi Camry ham o‘ng rulli ko‘rinishda ishlangan. Uning kapoti ostida 300 ot kuchiga ega G16E-GTS dvigateli joylashgan.
Toyota bu avtomobillarni seriyali ishlab chiqarishni rejalashtirmayapti. Ular faqat shou-kar sifatida yaratilgan.
Loyihalar Toyota rahbari Akio Toyoda va Toyota Racing rahbari Hiroki Nakajima o‘rtasidagi do‘stona bellashuv doirasida tayyorlangan. Ular qaysi jamoa noodatiy tyuning loyihasiga kreativroq yondashishini aniqlamoqchi bo‘lgan. G‘olibni esa tomoshabinlar tanlaydi.
Qaynoq24.uz BYD Great Tang elektromobili 17-iyun kuni taqdim etilishi haqida yozgan edi.
