Pekin 2026 avtosalonida Chery kompaniyasi tomonidan yangi Chery Arrizo X avtomobili namoyish etildi. Bu haqda CNC xabar bermoqda.
Modelning eng muhim ko‘rsatkichi — aerodinamik qarshilik darajasi 0,196 Cd bo‘lishi. Bu zamonaviy sedanlar orasida eng past natijalardan biri hisoblanadi. Avtomobil fastbek uslubida ishlab chiqilgan bo‘lib, silliq kuzov shakli havo qarshiligini kamaytirishga qaratilgan.
Tashqi dizaynda yopiq old panjara, butun kenglik bo‘ylab LED chiroqlar, yashirin eshik tutqichlari va aerodinamik disklar qo‘llangan. Orqa qismda esa uzluksiz chiroq chizig‘i va kichik spoyler joylashgan. Texnik jihatdan model 2,0 litrli turbomotor asosida ishlab chiqilishi kutilmoqda. U 8 pog‘onali avtomat uzatma bilan ishlaydi. Bu esa kompaniya hali ham ichki yonuv dvigateli va gibrid platformalarni rivojlantirishga e’tibor qaratayotganini ko‘rsatadi.
Shuningdek, avtomobilda moslashuvchan amortizatsiya tizimi joriy etilishi rejalashtirilgan. U yo‘l sharoitiga qarab avtomatik sozlanadi va haydovchiga qulaylik yaratadi.
Ichki qismda zamonaviy “aqlli kokpit” tizimi o‘rnatilgan. U ovoz orqali boshqaruvni qo‘llab-quvvatlaydi va tezkor ishlovchi chip bilan ta’minlangan. Haydovchiga yordam tizimlari ham kengaytirilgan bo‘lib, avtomobilni turli vaziyatlarda qo‘llab-quvvatlaydi.
Arrizo X hozircha konsept model bo‘lib, seriyali ishlab chiqarish uchun mo‘ljallanmagan. U asosan kompaniyaning dizayn va texnologik yo‘nalishini ko‘rsatadi.
Qaynoq24.uz Chery Fengyun T9L Xitoyda rekord buyurtma olgani haqida yozgan edi.
