Chery kompaniyasi tomonidan taqdim etilgan Chery Fengyun T9L krossoveri qisqa vaqt ichida katta talabga ega bo‘ldi. Bu haqda Mydrivers nashri xabar bermoqda.
Kompaniya ma’lumotiga ko‘ra, model sotuv boshlanganidan so‘ng atigi 3 soat ichida 15 658 ta buyurtma yig‘di. Avtomobil boshlang‘ich narxi $18,5 mingdan boshlanadi. Yangi model uzunligi 4 870 mm va g‘ildirak bazasi 2 920 mm bo‘lgan keng besh o‘rindiqli SUV sifatida taqdim etilgan. Salon zamonaviy dizaynga ega bo‘lib, raqamli panel, katta markaziy ekran va boy jihozlar bilan ajralib turadi. Hatto bazaviy versiyada ham o‘rindiqlar isitish, ventilyatsiya va massaj funksiyalariga ega.
Avtomobil ichida “nol gravitatsiya” o‘rindiqlari, 17,3 dyuymli orqa ekran, 2 kv metrli panoramali tom va 23 ta karnayli audio tizim mavjud. Bagaj hajmi 1 597 litrgacha yetadi, salon esa ikki kishilik yotoq holatiga keltirilishi mumkin.
Texnik jihatdan model Kunpeng Super Hybrid CDM 6.0 tizimiga asoslangan. Bazaviy versiya 1,5 litrli dvigatel va elektromotor bilan 242 kVt quvvat beradi hamda 135 kmgacha elektrda harakatlana oladi. Kuchliroq versiyalar 375 kVtgacha quvvatga ega bo‘lib, 230 kmgacha elektr yurish imkonini beradi. Umumiy yurish zaxirasi esa 2 000 kmgacha yetadi.
Eng yuqori komplektatsiyada ikki elektromotorli to‘liq g‘ildirakdan tortish tizimi mavjud. U 435 kVt quvvat ishlab chiqaradi, 0 dan 100 km/soat tezlikka 5 soniyada chiqadi va maksimal 240 km/soat tezlikka erishadi.
Modelda haydovchiga yordam tizimlari ham keng joriy etilgan. Bazaviy Falcon 200 tizimidan tortib, lidar va 27 ta sensor bilan jihozlangan Falcon 700 tizimigacha mavjud. Avtomobil avtomatik haydash va to‘liq avtomatik parkovka funksiyalarini qo‘llab-quvvatlaydi.
Qaynoq24.uz Rossiyada Chevrolet Tracker narxi pasaygani haqida yozgan edi.
