24 kg dan ortiq narkotik moddalar kontrabandasi fosh etildi. Bu haqda Davlat xavfsizlik xizmati xabar bermoqda.
Ma’lumotlarga ko‘ra, Marg‘ilon shahrida yashovchi, 1973-yilda tug‘ilgan va avval ham narkojinoyat uchun sudlangan shaxs kuzatuvga olingan. U Qirg‘izistondan olib kelingan narkotik moddani Xo‘jaobod tumanidagi yashirin joydan olib chiqishga uringan paytda qo‘lga olindi.
Aniqlanishicha, gumonlanuvchi 24 kg 475 gramm “gashish” moddani o‘z sheriklari bilan birga kontrabanda yo‘li bilan olib kirgan. U ushbu modda bilan qo‘lga tushib, ashyoviy dalillar bilan ushlangan. Mazkur holat yuzasidan Jinoyat kodeksining kontrabanda va giyohvandlik vositalarini o‘tkazishga oid moddalari bilan jinoyat ishi qo‘zg‘atildi. Gumonlanuvchiga nisbatan qamoq ehtiyot chorasi qo‘llangan.
Hozirda tergov harakatlari davom etmoqda. Huquq-tartibot organlari uning jinoiy sheriklarini aniqlash ustida ishlamoqda.
Qaynoq24.uz sobiq bank xodimi 6 ming dollarni o‘zlashtirib yuborgani aniqlangani haqida yozgan edi.
