Shavkat Mirziyoyev Farg‘ona viloyatiga tashrifi doirasida Farg‘ona xalqaro aeroportini rivojlantirish konsepsiyasi bilan tanishdi. Bu haqda prezident matbuot xizmati xabar berdi.
Bugungi kunda aeroport terminali 30 yildan ortiq vaqt davomida ishlamoqda. Uning quvvati va xizmat sifati zamonaviy talabga to‘liq mos kelmay qolgan. Shu sabab aeroport infratuzilmasini kompleks rivojlantirish rejalashtirilgan. Bu hududdagi iqtisodiy faollik va sayyohlar oqimi oshib borayotgani bilan izohlanadi.
Loyihada uchish-qo‘nish yo‘lagini uzaytirish va kengaytirish ko‘zda tutilgan. Aerodrom infratuzilmasi ham to‘liq modernizatsiya qilinadi. Yangi yo‘lovchi va yuk terminallari quriladi. Yangi terminal maydoni 20 ming kvadrat metr bo‘ladi. U bir vaqtning o‘zida 1,2 ming yo‘lovchiga xizmat ko‘rsata oladi. Bu hozirgi quvvatdan ikki barobar ko‘p.
Aeroportda samolyot turargohlari ham ko‘paytiriladi. Ularning soni 10 tagacha yetkaziladi. Bu havo kemalarini qabul qilish imkonini kengaytiradi.
Terminalda keng kutish zallari barpo etiladi. Ro‘yxatdan o‘tish va nazorat tizimlari zamonaviy shaklga o‘tkaziladi. Yuqori martabali mehmonlar uchun alohida xizmatlar ham joriy etiladi.
Davlat rahbari aeroport har qanday hududning “darvozasi” ekanini ta’kidladi. U zamonaviy servisni yo‘lga qo‘yish zarurligini qayd etdi.
Shuningdek, loyiha xalqaro standartlar asosida amalga oshiriladi. Qurilish va boshqaruvga xorijiy tajribaga ega operatorlar jalb qilinadi.
Qaynoq24.uz Marg‘ilon shahrida “Burhoniddin Marg‘inoniy” ilmiy-ma’rifiy va turizm majmuasi ochilgani haqida yozgan edi.
