OpenAI AQShda birjaga chiqish uchun dastlabki hujjatlarni topshirdi. Kompaniya IPO jarayoniga tayyorgarlik doirasida Qimmatli qog‘ozlar va birjalar komissiyasiga maxfiy ariza yuborgan.
OpenAI ChatGPT sun’iy intellekt chat-botini ishlab chiqqan kompaniya sifatida tanilgan. Kompaniya 8-iyun kuni e’lon qilgan bayonotida S-1 shaklidagi ariza SECga maxfiy tartibda topshirilganini ma’lum qildi.
Ushbu hujjat AQShda aksiyalarni birlamchi ommaviy joylashtirish va keyinchalik fond bozoriga chiqish uchun zarur bosqich hisoblanadi.
OpenAI hozircha IPO muddatlari bo‘yicha yakuniy qaror qabul qilmagan. Kompaniya birjaga chiqish jarayoni biroz vaqt olishi mumkinligini bildirdi.
“Bu biroz vaqt olishi mumkin, chunki xususiy kompaniya sifatida amalga oshirish osonroq bo‘lgan ishlar bor”, deyiladi kompaniya xabarida.
Reuters baholashicha, OpenAI fond bozoriga sentabr oyidayoq chiqishi mumkin. Kompaniya kapitallashuvi $1 trln darajasiga yetishi ehtimoli aytilmoqda.
OpenAI’ning IPOga tayyorgarligi sun’iy intellekt bozorida raqobat kuchaygan bir paytga to‘g‘ri kelmoqda. Bir necha kun avval Claude sun’iy intellekt modelini ishlab chiqqan Anthropic ham birjaga chiqish rejasini e’lon qilgan edi. Shuningdek, iyun oxirigacha Ilon Maskga tegishli SpaceX kompaniyasining ham IPO o‘tkazishi kutilmoqda.
OpenAI’ning ehtimoliy IPOsi texnologiya bozori uchun yirik voqealardan biri bo‘lishi mumkin. Kompaniya jalb qilinadigan mablag‘larni sun’iy intellekt infratuzilmasi, yangi modellar va hisoblash quvvatlarini kengaytirishga yo‘naltirishi kutilmoqda.
Qaynoq24.uz OpenAI yangi ChatGPT Atlas brauzerini taqdim etgani haqida yozgan edi.
