Honor kompaniyasining bo‘lajak Honor Magic 9 smartfoni ixchamroq ekran, katta sig‘imli batareya va nemis ARRI kompaniyasi bilan hamkorlikda yaratilgan kamera tizimiga ega bo‘lishi mumkin. Bu haqda insayder Smart Pikachu xabar berdi.
Manbaga ko‘ra, yangi smartfon 6,4 dyuymli ekranga ega bo‘ladi. Qurilma avval taxmin qilinganidek Air nomi bilan emas, Honor Magic 9 sifatida chiqarilishi mumkin. Bu esa Honor ixchamroq flagman segmentida yangi model tayyorlayotganiga ishora qilmoqda.
Honor Magic 9 Snapdragon 8 Elite Gen 5 chipseti bilan jihozlanishi kutilmoqda. Shuningdek, smartfon 200 megapikselli asosiy kamera va 8000 mA·soat sig‘imli akkumulyator olishi aytilmoqda. Bunday batareya ixcham ekranli flagman uchun juda katta ko‘rsatkich hisoblanadi va qurilmaning avtonom ishlash vaqtini sezilarli oshirishi mumkin.
Smartfon tekis displeyga ega bo‘lishi, ekran burchaklari esa yumshoq yumaloqlashtirilishi aytilmoqda. Qurilmada 2D yuzni tanish funksiyasi ham bo‘lishi mumkin. Bundan tashqari, manba alohida “ARRI protsessori” haqida ham ma’lumot bergan. Bu chip foto va video imkoniyatlarini yaxshilashga xizmat qilishi ehtimol.
Avvalroq Honor va ARRI o‘rtasida yangi smartfonlarda foto hamda video suratga olish sifatini oshirish bo‘yicha hamkorlik yo‘lga qo‘yilgani haqida xabarlar tarqalgan edi. ARRI — 1917-yilda Myunxenda tashkil etilgan mashhur nemis kompaniyasi bo‘lib, kino ishlab chiqarish va ko‘ngilochar industriya uchun professional texnika ishlab chiqaruvchi yetakchi brendlardan biri hisoblanadi.
Agar ma’lumotlar tasdiqlansa, Honor Magic 9 kuchli protsessor, katta batareya va professional kino texnologiyalariga yaqinlashtirilgan kamera tizimi bilan flagman smartfonlar bozorida e’tibor tortishi mumkin. Hozircha kompaniya qurilma haqida rasmiy ma’lumot bermagan.
Qaynoq24.uz Honor X80 Pro Max cho‘lda 17 soatlik sinovdan o‘tgani haqida yozgan edi.
