Qatarning Ras-Laffan sanoat zonasidagi yirik gaz obyektida yuz bergan portlash oqibatida kamida 13 kishi halok bo‘ldi, 66 kishi jarohatlandi. Hodisa mamlakatning asosiy suyultirilgan tabiiy gaz infratuzilmasi joylashgan hududda sodir bo‘lgan.
Qatar Ichki ishlar vazirligi hodisani “texnik avariya” deb baholadi. Portlash yakshanba kuni kechqurun Ras-Laffan sanoat zonasidagi Barzan mahalliy gaz ta’minoti obyektida yuz bergan. Voqea vaqtida portlash alangasi osmonni yorqin to‘q sariq rangga bo‘yagani, zarba to‘lqini esa Doha markazigacha sezilgani aytilmoqda.
Qatar energetika vaziri Saad Sherida al-Kaabi portlash mamlakatning gaz eksportiga ta’sir qilmasligini bildirdi. Uning ta’kidlashicha, hodisa sabotaj yoki dushmanona harakat bilan bog‘liq emas, balki avariya sifatida ko‘rilmoqda.
Rasmiylarga ko‘ra, portlash Barzan gaz ta’minoti obyektida operatsiyalarni qayta ishga tushirish jarayonida yuz bergan. QatarEnergy favqulodda xizmatlar voqea joyiga zudlik bilan yetib borganini va yong‘in nazoratga olinganini ma’lum qildi.
Energetika vaziri halok bo‘lganlar Hindiston va Pokiston fuqarolari ekanini tasdiqladi. Hindistonning Dohadagi elchixonasi Qatar rasmiylari bilan doimiy aloqada ekanini, qurbonlar va jarohatlanganlarning oilalariga yordam ko‘rsatilishini bildirdi.
Ras-Laffan porti dunyodagi eng yirik sun’iy bandargohlardan biri hisoblanadi. Hududda Qatar gaz sanoatining asosiy obyektlari, jumladan, suyultirilgan tabiiy gazni qayta ishlash va eksport qilish infratuzilmasi joylashgan.
QatarEnergy ma’lumotiga ko‘ra, portlash 21-iyun, yakshanba kuni kechqurun Barzan mahalliy gaz ta’minoti obyektida sodir bo‘lgan. Favqulodda choralar natijasida yong‘in nazoratga olingan.
Qaynoq24.uz Qatarda gaz qazib olishni tiklash muddati ma’lum qilingani haqida yozgan edi.
