Tecno kompaniyasi tomonidan Tecno Camon 50 Slim smartfoni taqdim etildi. Bu haqda Gizmochina nashri xabar berdi.
Qurilmaning narxi va sotuvga chiqish muddati hozircha ochiqlanmagan, biroq ro‘yxatda smartfonning asosiy texnik xususiyatlari va imkoniyatlari keltirilgan.
Modelning eng muhim jihatlaridan biri uning dizayni bo‘ldi. Tecno Camon 50 Slim korpusi atigi 6,39 mm qalinlikka ega. Smartfon egri korpus dizayni bilan ishlab chiqilgan va orqa kamera moduliga qo‘shimcha LED tizimi joylashtirilgan.
Ushbu yoritish tizimi Tecno‘ning AI Mood Light funksiyasi bilan ishlaydi. U 354 ta mini-LEDdan iborat bo‘lib, bildirishnomalar va boshqa interaktiv holatlarda turli yorug‘lik effektlarini namoyish qiladi. Smartfon New Mondrian, Prism Black, Jungle Green, Van Gogh Blue va Burgundy Red ranglarida taklif etiladi.
Old tomonda qurilma 6,78 dyuymli AMOLED displey bilan jihozlangan. Ekran 1224×2720 piksel o‘lchamdagi 1,5K aniqlikka va 144 Gs yangilanish chastotasiga ega. Bu animatsiyalar, sahifalar aylantirilishi va o‘yinlarda yanada silliq tasvirni ta’minlashga xizmat qiladi.
Texnik imkoniyatlar
Tecno Camon 50 Slim MediaTek Helio G200 Ultimate protsessorida ishlaydi. Qurilma HiOS 16.2 operatsion tizimi bilan taqdim etilgan. Smartfon 8 GB tezkor xotira, 128 GB yoki 256 GB ichki xotira bilan chiqariladi. Shuningdek, 16 GBgacha virtual tezkor xotira kengaytirish imkoniyati mavjud.
Kamera qismida smartfon 50 megapikselli Sony LYT-600 asosiy sensoriga ega. Ushbu kamera 1/1,56 dyuymli sensorga asoslangan. Orqa tomonda qo‘shimcha flicker sensori ham bor. Selfi uchun esa 32 megapikselli old kamera o‘rnatilgan.
Tecno qurilmaga suv ostida suratga olish, sun’iy intellekt asosidagi tasvirni qayta ishlash vositalari va bir nechta portret fokus masofalarini qo‘llab-quvvatlash kabi funksiyalarni ham qo‘shgan.
Camon 50 Slim 5600 mA/soat sig‘imli batareya bilan jihozlangan. U 60 Vt tezkor quvvatlashni qo‘llab-quvvatlaydi. Kompaniya ta’kidlashicha, akkumulyator besh yilgacha barqaror ishlashga mo‘ljallangan.
Qo‘shimcha imkoniyatlar qatorida Dolby Atmos qo‘llab-quvvatlovchi ikkita karnay, NFC, infraqizil port, IP68 va IP69 himoya darajalari bor. Smartfon harbiy darajadagi chidamlilik sertifikatiga ega ekani ham qayd etilgan.
Bundan tashqari, Tecno Camon 50 Slim microSD karta orqali 2 TB gacha xotira kengaytirishni qo‘llab-quvvatlaydi. Qurilmaning faqat 4G LTE tarmog‘ida ishlashi esa uning ayrim bozorlarga mo‘ljallangan model bo‘lishi mumkinligini ko‘rsatmoqda.
Qaynoq24.uz Tecno Spark 50 Pro smartfoni taqdim etilgani haqida yozgan edi.
