BMW kompaniyasi tomonidan beshinchi avlod BMW X5 avtomobili rasman taqdim etildi. Bu haqda Kolesa.kz nashri xabar bermoqda.
Yangi BMW X5’ning uzunligi 4994 mmni, g‘ildirak bazasi esa 3035 mmni tashkil qiladi. Krossover tashqi ko‘rinishida toraytirilgan radiator panjarasi, X harfiga o‘xshash kunduzgi yurish chiroqlari, ular orasiga yashirilgan faralar hamda an’anaviy eshik tutqichlari o‘rniga qo‘llangan yangi aerodinamik elementlar bilan ajralib turadi.
BMW ma’lumotlariga ko‘ra, yangi X5 uchun bazaviy komplektatsiyadayoq 21 dyuymli g‘ildirak disklari taklif etiladi. Opsiyalar ro‘yxatida esa 23 dyuymgacha bo‘lgan disklar mavjud bo‘ladi. Avtomobil standart holatda adaptiv osma bilan jihozlanadi. Qo‘shimcha haq evaziga pnevmatik osma va buriluvchi orqa g‘ildiraklar tizimi ham taklif etiladi.
Ichki qismi
Salon arxitekturasi ham Neue Klasse yo‘nalishidagi yangi BMW modellari bilan uyg‘unlashtirilgan. X5 g‘ayrioddiy shakldagi, vertikal spisali rul, 17,9 dyuymli markaziy sensor ekran va old oynaga yaqin joylashtirilgan ingichka raqamli asboblar paneliga ega bo‘ladi. Ushbu panel proyeksion displey bilan birgalikda ishlaydi.
Yangi krossover uchun 14,6 dyuymli yo‘lovchi ekrani ham opsiya sifatida taklif etiladi. To‘liq jihozlar ro‘yxati savdo boshlanishiga yaqin e’lon qilinadi. Biroq hozirdanoq avtomobil to‘liq isitish va sovitish funksiyalari, o‘rindiqlar ventilyatsiyasi, massaj funksiyasi, 12 yoki 18 dinamikli audiosistema, to‘rt zonali iqlim nazorati, ilg‘or haydovchi yordamchilari majmuasi va avtomatik yopiladigan eshiklar bilan taklif etilishi ma’lum.
BMW X5’ning kuch agregatlari qatori keng bo‘ladi. Kelajakda model benzinli, dizel, plug-in hybrid, to‘liq elektr va vodorodli versiyalarda chiqariladi. Biroq savdo boshlanishida taklif etiladigan modifikatsiyalar soni nisbatan cheklangan bo‘ladi.
Texnik xususiyatlar
Dastlab yangi X5 3 litrli qatorli olti silindrli benzin dvigateli bilan sotuvga chiqadi. Ushbu motor 400 ot kuchi va 580 Nm aylanish momenti ishlab chiqaradi hamda 48 voltli starter-generator bilan to‘ldiriladi. Bunday kuch qurilmasi orqa yuritmali X5 40 va to‘liq yuritmali X5 40 xDrive versiyalarida qo‘llanadi.
Yevropa bozori uchun 3 litrli dizel dvigatelga ega X5 40d xDrive ham taklif etiladi. Ushbu versiya 313 ot kuchiga ega. Bundan tashqari, X5 50e plug-in hybrid modifikatsiyasi ham bo‘ladi. U 3 litrli qatorli dvigatel, 197 ot kuchiga ega elektromotor va 26,5 kVt·soat sig‘imli akkumulyator bilan jihozlanadi. Tizimning umumiy quvvati 490 ot kuchi va 700 Nmni tashkil qiladi. Elektr rejimida yurish zaxirasi 71 kmga yetadi.
Elektr versiya BMW iX5 60 nomi bilan debyut qiladi. U 141 yoki 144 kVt/soat sig‘imli akkumulyator va ikki elektromotor bilan jihozlanadi. Umumiy quvvat 578 ot kuchini tashkil qiladi. Bir marta quvvatlash bilan avtomobil 845 kmgacha yo‘l bosishi mumkin. 800 voltli elektr arxitekturasi 460 kVtgacha quvvatda tezkor quvvatlashni qo‘llab-quvvatlaydi. Buning hisobiga akkumulyatorni 10 foizdan 80 foizgacha 22 daqiqada quvvatlash mumkin bo‘ladi.
Yana qanday yangiliklar bor
BMW X5’ning vodorodli iX5 Hydrogen versiyasi ham tayyorlanmoqda. Bu BMW’ning yangi avlod X5 modelini turli energiya manbalariga moslashtirish strategiyasini ko‘rsatadi.
Yangi BMW X5 AQSh bozorida 2026-yil kuzida sotuvga chiqadi. Bazaviy orqa yuritmali benzinli versiya narxi 71 250 dollardan boshlanadi. To‘liq elektr iX5 60 esa kamida 81 250 dollar turadi va dilerlarga 2027-yil boshida yetib boradi.
Beshinchi avlod BMW X5 tashqi dizayn, salon texnologiyalari va kuch qurilmalari bo‘yicha sezilarli yangilanishlarga ega bo‘ldi. Shu bilan birga, model CLAR platformasini saqlab qolgan holda, BMW’ning yangi Neue Klasse dizayn falsafasiga yaqinlashdi.
Qaynoq24.uz Maextro S800 avtomobilining oltin bezakli versiyasi taqdim etilishi haqida yozgan edi.
