BYD kompaniyasi 2027-yilgi BYD Seal 06 modelining ilk rasmiy suratlarini e’lon qildi. Bu haqda CNC xabar bermoqda.
Avtomobil suratlarini 27-iyul kuni BYD Ocean Series bo‘linmasi bosh direktori Chjan Chjuo taqdim etdi. Hozircha model dastlabki namoyish bosqichida bo‘lib, uning bozorga chiqarilish sanasi, narxi va yakuniy komplektatsiyalari rasman ochiqlanmagan.
Yangi Seal 06 amaldagi modelning umumiy dizayn yo‘nalishini saqlab qolgan. Shu bilan birga, avtomobilning old qismi soddalashtirilgan, faralar shakli, pastki bamper elementlari va orqa chiroqlar dizayni qayta ishlangan. Old oynaning yuqori qismida tomga o‘rnatilgan LiDAR sensori ham ko‘rinadi.
BYD hozircha ushbu uskuna barcha versiyalarda standart bo‘lishi yoki ayrim komplektatsiyalarda qo‘shimcha variant sifatida taklif etilishini ma’lum qilmagan. LiDAR yordamida ishlaydigan haydovchiga ko‘maklashuvchi tizimlarning imkoniyatlari ham oshkor etilmadi.
O‘lchamlar va texnik xususiyatlar
Dastlabki ma’lumotlarga ko‘ra, yangilangan Seal 06 uzunligi 4 870 mm, kengligi 1 890 mm va balandligi 1 495 mmni tashkil etadi. G‘ildirak bazasi 2 820 mmga teng. Shu tariqa, avtomobil amaldagi Seal 06 EV’dan 150 mm uzunroq bo‘ladi.
Elektromobilning bir dvigatelli ikki xil versiyasi ishlab chiqarilishi kutilmoqda. Ularning quvvati mos ravishda 120 va 240 kWni tashkil etishi mumkin. Hozirgi Seal 06 EV’da esa 110 va 160 kW quvvatli motorlar qo‘llanadi.
Demak, yuqori komplektatsiyadagi dvigatel quvvati 80 kWga oshadi.
Yangilangan elektromobil litiy-temir-fosfat turidagi akkumulyator bilan jihozlanishi aytilmoqda. Biroq batareya sig‘imi va bir quvvatlanishda bosib o‘tiladigan masofa hozircha ochiqlanmagan. Avvalgi ma’lumotlarda Seal 06 oilasining ayrim versiyalari 630 kmgacha yurish zaxirasi va BYD’ning Blade Battery texnologiyasiga ega bo‘lishi qayd etilgan edi.
Qo‘shimcha imkoniyatlar
Seal 06’ning DM-i plagin-gibrid versiyalarida ham kuch qurilmasi yangilanadi. Ikkala modifikatsiyada 175 kW quvvatli elektr motoridan foydalanilishi kutilmoqda. Versiyalardan biri faqat elektr quvvatida 150 km, ikkinchisi esa 155 km masofa bosib o‘tishi mumkin.
150 km yurish zaxirasiga ega modifikatsiyaning energiya sarfi har 100 kmga 15,2 kWh, 155 km masofaga mo‘ljallangan versiyada esa 14,7 kWh bo‘lishi aytilmoqda. Ushbu ko‘rsatkichlar hozircha tartibga soluvchi organlarga taqdim etilgan dastlabki ma’lumotlarga asoslangan.
2026-yil may oyida Seal 06 DM-i sedani Avstraliyaning ANCAP xavfsizlik sinovlarida besh yulduzli natijani qayd etgan edi.
Rasmiy suratlar Seal 06 oilasi jiddiy yangilanishini tasdiqlamoqda. Biroq BYD avtomobilning taqdimot sanasi, narxlari, komplektatsiyalari va e’lon qilingan barcha versiyalar ishlab chiqarishga chiqarilishi yoki chiqarilmasligini hozircha ma’lum qilmagan.
Qaynoq24.uz BYD Qin Max avtomobili qanday dizaynda chiqishi haqida yozgan edi.
