BYD kompaniyasi yangi BYD Qin Max o‘rta o‘lchamli sedanining interyerini namoyish etdi. Bu haqda CNC xabar bermoqda.
Dilerlardan sizdirilgan ma’lumotlarga ko‘ra, Qin Max’ning DM-i plagin-gibrid versiyasi to‘rtta komplektatsiyada taklif qilinadi. Uning taxminiy narxi 115 mingdan 145 ming yuangacha yoki $16,9 mingdan $21,3 minggacha bo‘lishi mumkin.
Elektromobil versiyasi esa beshta komplektatsiyada chiqarilib, 125–155 ming yuan, ya’ni $18,4–22,8 ming oralig‘ida baholanishi kutilmoqda. BYD hozircha ushbu narxlarni rasman tasdiqlamagan.
Qin Max tashqi ko‘rinishida BYD Dynasty oilasiga xos dizayn uslubi davom ettirilgan. Old qismida faralarni birlashtiruvchi xrom bezak va uch bo‘limli havo kirish panjarasi joylashgan. Orqa qismida esa Xitoy tuguni shaklidan ilhomlangan, qoraytirilgan va qatlamli yorug‘lik effektiga ega yaxlit LED chiroqlar o‘rnatilgan.
Avtomobilning uzunligi 4866 mm, kengligi 1880 mm, balandligi 1495 mmni tashkil etadi. G‘ildiraklar bazasi 2820 mmga teng. Ushbu o‘lchamlar Qin Max’ni o‘rta o‘lchamli sedanlar segmentiga kiritadi.
Salon o‘rab turuvchi arxitekturaga ega bo‘lib, xrom elementlar bilan bezatilgan. Avtomobilda to‘liq raqamli asboblar paneli, markazda joylashgan suzuvchi sensorli ekran va ikki spitsali ko‘p funksiyali rul mavjud. Markaziy konsolda smartfonlarni simsiz quvvatlash maydonchasi va ikkita stakan qo‘ygich joylashtirilgan. Xaridorlarga salonning yangi Dawn Purple binafsha rangli varianti ham taklif etiladi.
Qin Max’ning DM-i plagin-gibrid versiyasi 1,5 litrli benzin dvigateli va elektr motoridan foydalanadi. Ichki yonuv dvigatelining maksimal quvvati 74 kVtni, elektr motoriniki esa 175 kVt yoki 235 ot kuchini tashkil etadi. Model litiy-temir-fosfat turidagi akkumulyator bilan jihozlanadi.
Qaynoq24.uz BYD Denza Z9S 1 194 ot kuchi bilan namoyish etilgani haqida yozgan edi.
