Kia kompaniyasi tomonidan Pusan shahrida o‘tayotgan BIMOS-2026 avtosalonida Kia EV3 avtomobili namoyish etildi. Model yangi premyera bo‘lmasa-da, u brendning Janubiy Koreya bozoridagi muhim ommaviy elektromobillaridan biri sifatida ko‘rsatildi.
Ko‘rgazmada Kia EV3’ning kuchli GT versiyasi emas, balki oddiy modifikatsiyasi namoyish etilgan. Bu esa kompaniya asosiy e’tiborni imij uchun chiqarilgan kamyob versiyaga emas, kundalik foydalanish va ommaviy savdoga mo‘ljallangan elektromobilga qaratayotganini ko‘rsatadi.
Kia EV3 tashqi ko‘rinishi brendning yirik EV9 modeliga o‘xshash uslubda ishlangan. Krossover baland kuzov, qora ustunlar, kontrast arkalar, vertikal Star Map chiroqlari hamda Digital Tiger Face deb ataluvchi old qismi bilan ajralib turadi.
O‘lchamlari bo‘yicha EV3 EV6’dan ixchamroq. Uning uzunligi 4300 mm, eni 1850 mm, balandligi esa 1560 mmni tashkil qiladi. Shu sababli model shahar sharoitida qulay harakatlanish, oilaviy foydalanish va kundalik qatnovlar uchun mo‘ljallangan kompakt elektr krossover sifatida ko‘rilmoqda.
Texnik imkoniyatlar
Texnik jihatdan Kia EV3 rekord ko‘rsatkichlarga emas, muvozanatli imkoniyatlarga tayanadi. Bazaviy versiyalar old o‘qda joylashgan bitta elektromotor bilan jihozlangan. U 150 kVt yoki 204 ot kuchi quvvat va 283 Nm aylanish momenti ishlab chiqaradi.
Krossover 100 km/soat tezlikka taxminan 7,5 soniyada chiqadi. Xaridorlarga 58,3 kVt·soat va 81,4 kVt/soat sig‘imli akkumulyatorlar taklif etiladi. Long Range versiyasining WLTP sikli bo‘yicha yurish zaxirasi 600 kmgacha yetadi.
Tezkor quvvatlash ko‘rsatkichi rekord darajada bo‘lmasa-da, amaliy foydalanish uchun yetarli. Akkumulyatorni 10 foizdan 80 foizgacha taxminan yarim soatda quvvatlantirish mumkin.
Kia EV3’ning GT versiyasi ham alohida taqdim etilgan. Janubiy Koreyada bunday modifikatsiya 53,75 mln von yoki taxminan 37 ming dollarga baholangan. U to‘liq uzatma, 288 ot kuchi quvvat, 468 Nm aylanish momenti va 100 km/soatgacha 5,7 soniyada tezlanish imkoniyatiga ega.
Biroq Pusandagi ko‘rgazmada asosiy urg‘u aynan oddiy Kia EV3’ga berildi. Kompaniya ushbu model orqali elektromobillar segmentida kundalik foydalanish uchun qulay, uzoq masofaga yura oladigan va ommaviy xaridorlarga mo‘ljallangan ixcham krossover taklif qilmoqda.
Qaynoq24.uz Kia Sportage 2026 avtomobili haqida yozgan edi.
