2025-yil yakunlanmoqda, Samsung esa odatdagidek yangi flagmanlar seriyasini — Galaxy S26 liniyasini taqdim etishga hozirlik ko‘ryapti. Maqolada Samsung Galaxy S26 Plus va S26 Ultra smartfonlari farqi va kelajakda qanday xususiyatlar bilan chiqishini birga muhokama qilamiz.
Tashqi dizayn
Galaxy S26 Ultra, odatdagidek, eng kuchli flagman maqomini saqlab qoladi. Tashqi ko‘rinish jihatidan keskin farq bo‘lmasa-da, qurilmaning titan ramkasi, mustahkam Corning Gorilla Glass Armor 2 qoplamasi va ichki imkoniyatlari uni yuqori toifaga olib chiqadi. S Pen stilusi ham saqlanib qoladi. Galaxy S26 Plus esa ancha ixcham bo‘lib, alyuminiy ramka, Gorilla Glass Victus 2 va yupqa konstruksiya bilan taqdim etiladi. Dizayn jihatidan ikkala model ham tanish Galaxy uslubida, lekin Ultra yanada og‘ir, kattaroq va premium materiali bilan ajraladi.
Ekran va displey
Ekran masalasida ham Ultra ustunlikka ega. S26 Plus 6,7 dyuymli Dynamic AMOLED 2X displey, 2600 nit atrofidagi piko yorqinlik va HDR qo‘llab-quvvatlash bilan keladi. S26 Ultra esa 6,9 dyuymli ekran, 3000 nitgacha yorqinlik va anti-blik qoplama bilan jihozlanadi. Aynan shu anti-blik qatlam ochiq havoda ekranni sezilarli yaxshiroq ko‘rinadigan qiladi. Shuningdek, Ultra displeyida maxfiylikni oshiruvchi qo‘shimcha texnologiya ham bo‘lishi kutilmoqda.
Protsessor
Protsessor bo‘limida Samsung yana hududlarga qarab chipset ajratish siyosatini davom ettiradi. Galaxy S26 Plus AQSH, Kanada va Xitoyda Snapdragon 8 Elite Gen 5’da ishlaydi, boshqa hududlarda esa 2 nanometr tex jarayonida ishlab chiqarilgan Exynos 2600 qo‘llanadi. Ultra esa butun dunyoda faqat Qualcomm platformasida ishlaydi va bu uning barqaror unumdorligini ta’minlaydi. Har ikki model Android 16 operatsion tizimi va yetti yil davomida yangilanishlarga ega bo‘ladi.
Kamera
Kamera qismida tenglik yo‘q. Galaxy S26 Plus uch kamerali tizimni taklif qiladi: 50 megapikselli asosiy modul, 12 megapikselli ultra-keng kamera va 3x zoomga ega 10 megapikselli telefoto. Galaxy S26 Ultra esa to‘rt kamerali tizimi bilan ancha ustun turadi: 200 megapikselli asosiy modul, 50 megapikselli ultra-keng sensor, 3x zoomga ega 10 megapikselli telefoto va 5x periskop zoomga ega 50 megapikselli qo‘shimcha kamera. Yirik sensorlar, keng diafragma va yuqori aniqlikdagi zoom Ultra modelini mobil fotografiya uchun haqiqiy professional vositaga aylantiradi.
Batareya
Batareya bo‘limida ham Ultra yetakchi. Galaxy S26 Plus taxminan 4900 mA/soat sig‘imga ega bo‘lsa, Ultra 5200 mA/soatlik akkumulyator bilan taqdim etiladi. Bundan tashqari, Ultra 60 vattgacha tezkor zaryadni qo‘llab-quvvatlaydi, Plus esa 45 vatt bilan cheklanadi. Har ikkala model Qi2 simsiz zaryadlash tizimi va magnitli aksessuarlarni qo‘llab-quvvatlaydi, ammo Ultra’da zaryadlash jarayoni ancha tez bo‘lishi kutilmoqda.
Yakunda shuni aytish mumkin: Samsung bu yil radikal o‘zgarishlar qilmagan bo‘lsa-da, Ultra modeli yana o‘zining muqim ustunliklarini saqlab qolmoqda. Kengroq imkoniyatlar, kuchli kamera, yanada yorqin displey, premium materiallar va uzoqroq ishlash muddati uni maksimalistlar uchun ideal tanlovga aylantiradi. Galaxy S26 Plus esa kunlik qulaylikni afzal ko‘radigan, yengilroq va ixchamroq flagman izlayotgan foydalanuvchilar uchun mos variant bo‘lib qoladi. Narx farqi aynan Ultra’da jamlangan qo‘shimcha funksiyalar bilan oqlanadi, ammo bu imkoniyatlarning barchasi hamma foydalanuvchilarga birdek zarur emas. Shuning uchun tanlov ehtiyoj va foydalanish tarziga bog‘liq.
Qaynoq24.uz Samsung Galaxy S27 Ultra eski kamera bilan chiqishi mumkinligi haqida yozgan edi.
