Yangi Honor Win smartfonlari 10 000 mA/soat akkumulyator bilan taqdim etiladi. Bu haqda Honor kompaniyasi rasmiy taqdimot arafasida e’lon qilgan yangi tizerda ma’lum qildi.
Win seriyasiga mansub yangi o‘yin smartfonlarining asosiy jihati Turbine Cooling nomli faol sovitish tizimi bo‘ladi. Mazkur tizim mini ventilyatordan iborat bo‘lib, u daqiqasiga 25 ming aylanish tezligigacha ishlay oladi.
Konstruktsiya qizib ketuvchi asosiy komponentlarga to‘g‘ridan-to‘g‘ri havo oqimini yo‘naltiradi. Ishlab chiqaruvchi ma’lumotiga ko‘ra, maksimal rejimda ishlaganda chip harorati 5,7 darajaga pasayadi. Bu esa trottling va unumdorlikning tushib ketishini oldini oladi. Honor ventilyator kamida besh yil xizmat qilishini va’da qilmoqda.
Honor Win va soddalashtirilgan Win RT modellari flagman darajadagi Qualcomm’ning Snapdragon 8 Elite Gen 5 protsessoriga ega bo‘ladi. Qurilmalar LPDDR5X Ultra tezkor xotirasi va UFS 4.1 doimiy xotirasi bilan jihozlanadi.
Yuqori unumdorlikka yo‘naltirilganiga qaramay, smartfonlar kamera imkoniyatlari bilan ham ajralib turadi. Asosiy modulda 50 megapikselli Sony LYT-700 sensori o‘rnatiladi. Ultra keng burchakli kamera 12 MP bo‘ladi. Honor Win’ning katta versiyasi qo‘shimcha ravishda 50 MP teleobyektiv va uch karra optik zumni qo‘llab-quvvatlaydi.
Texnik xususiyatlar ro‘yxatiga 10 000 mA/soat sig‘imli akkumulyator ham kiradi. Qurilma 100 vattli tezkor quvvatlashni qo‘llab-quvvatlaydi. Shuningdek, smartfonlar 6,83 dyuymli OLED displey bilan ta’minlanadi.
Mutaxassislar Honor Win seriyasini o‘yin smartfonlari segmentida jiddiy raqobatchi bo‘lishini kutmoqda. Faol sovitish tizimi va katta akkumulyator uzoq muddatli yuqori unumdorlikni ta’minlashga xizmat qilishi aytilmoqda.
Qaynoq24.uz eng yaxshi Honor smartfonlari haqida yozgan edi.
