Google’ning yangi Google Pixel 10 smartfonlarida Gmail ilovasi bilan bog‘liq muammo kuzatilmoqda. Bu haqda Gizchina xabar bermoqda.
Ayrim foydalanuvchilarning aytishicha, elektron xatlarga javob yozish vaqtida Google’ning sun’iy intellektga asoslangan “Help me write” funksiyasi odatiy klaviatura ishiga xalaqit bermoqda.
Xabarlarga ko‘ra, foydalanuvchi Gmail’da xatga javob bermoqchi bo‘lganida ekranda klaviatura ochilishi o‘rniga “Help me write” taklifi ustuvor ko‘rinadi. Natijada ayrim Pixel 10 egalari javobni qo‘lda yozishda qiyinchilikka duch kelmoqda.
Bu holat Google’ning generativ AI imkoniyatlarini faol joriy etishi va foydalanuvchilar kutadigan oddiy interfeys funksiyalari o‘rtasidagi muvozanat masalasini yana kun tartibiga chiqardi. Pixel 10 liniyasi asosan AI imkoniyatlari bilan targ‘ib qilinayotganini hisobga olsak, muammo dasturiy optimallashtirish bilan bog‘liq bo‘lishi mumkin.
Foydalanuvchilar bu holatni AI funksiyasi elektron pochta bilan ishlash jarayonida “e’tiborni tortib olayotgani” sifatida ta’riflamoqda. Ularning asosiy shikoyati shundan iboratki, “Help me write” taklifini chetlab o‘tib, klaviaturaga tezda o‘tish oson emas.
Hozircha muammo barcha qurilmalarda kuzatilayotgani haqida ma’lumot yo‘q. Biroq bu holat ayrim Pixel 10 foydalanuvchilari uchun Gmail’da xatlarga javob yozishni noqulaylashtirgan.
Qaynoq24.uz Android 17 barqaror talqini Google Pixel smartfonlariga tarqatila boshlangani haqida yozgan edi.
