Honor kompaniyasi yangi Honor WIN 2 gaming-smartfonlari seriyasini yil oxirigacha taqdim etishi kutilmoqda. Bu haqda Huaweicentral xabar berdi.
Qurilma hali rasman namoyish etilmagan bo‘lsa-da, u allaqachon texnologik insayderlar e’tiboriga tushgan. Weibo‘dagi DigitalChatStation ma’lumotlariga ko‘ra, WIN 2 seriyasida displey atrofidagi hoshiyalar nihoyatda yupqa va barcha tomondan bir xil o‘lchamda bo‘ladi. Bu smartfonga yanada zamonaviy ko‘rinish berishi, kontentni tomosha qilish va o‘yin o‘ynash jarayonini qulaylashtirishi mumkin.
Bir xil hoshiyalar ekranning vizual muvozanatini saqlaydi va qurilmani yanada ixcham ko‘rsatadi. Ayniqsa, gaming-smartfonlar uchun bunday yechim muhim hisoblanadi, chunki kengroq va toza displey foydalanuvchiga o‘yin jarayonida ko‘proq maydonni ko‘rish imkonini beradi.
Avvalgi sizdirilgan ma’lumotlarga ko‘ra, WIN 2 seriyasi yangi avlod faol sovitish ventilyatori bilan jihozlanadi. Shuningdek, qurilma Snapdragon 8 Elite Gen 6 chipi, 10 000 mA/soat sig‘imli akkumulyator va 185 Gs yangilanish chastotasiga ega displey bilan taqdim etilishi mumkin.
Insayderning ta’kidlashicha, ushbu xususiyatlar Honor WIN 2 seriyasini joriy yilda 2 nanometrli flagman chip va 10 000 mA/soat akkumulyatorga ega bo‘lgan yagona gaming-smartfonlar qatoriga olib chiqishi mumkin.
Honor hozircha WIN 2 seriyasining rasmiy taqdimot sanasi va texnik xususiyatlarini tasdiqlamagan. Shu bois qurilma haqidagi ma’lumotlar hozircha sizdirilgan xabarlar darajasida qolmoqda.
Qaynoq24.uz Honor X80 Pro Max 11 000 mA/soat batareya bilan chiqishi haqida yozgan edi.
