Meta kompaniyasining erkin pul oqimi 2026-yilning ikkinchi choragida sun’iy intellekt, ma’lumotlar markazlari va hisoblash uskunalariga yo‘naltirilgan katta xarajatlar fonida 91% ga kamaydi, deb xabar bermoqda Reuters.
Aprel–iyun oylarida kompaniyaning erkin pul oqimi $784 mlnni tashkil etdi. Bir yil avval bu ko‘rsatkich $8,55 mlrdga teng edi. Moliyaviy hisobot e’lon qilingach, kompaniya aksiyalari qo‘shimcha savdolarda qariyb 10% ga arzonlashdi.
Shu bilan birga, kompaniyaning asosiy biznesi o‘sishda davom etdi. Meta daromadi chorak davomida 28% ga oshib, $60,8 mlrdga yetdi. Kompaniya tushumining asosiy qismini hamon Facebook va Instagram platformalaridagi reklama ta’minlamoqda.
Mark Sukerbergning aytishicha, kompaniyaning hisoblash quvvatlari sun’iy intellekt modellarini o‘qitish, ijtimoiy tarmoqlarni rivojlantirish, shaxsiy AI-yordamchilar va yangi mahsulotlarni yaratishga yo‘naltiriladi.
«Hisoblash resurslarimizning katta qismi modellarni o‘qitish, asosiy biznesni rivojlantirish, shaxsiy agentlar va yangi mahsulotlarni yaratishga sarflanadi», dedi Sukerberg.
Hozir kompaniya dunyo bo‘ylab 32 ta ma’lumotlar markazini boshqarmoqda yoki qurmoqda. Ularning 28 tasi AQShda joylashgan.
Kompaniya 2026-yilda kapital xarajatlari $130–145 mlrdni tashkil etishini kutmoqda. Avval prognozning quyi chegarasi $125 mlrd, yil boshida esa $115 mlrd etib belgilangan edi.
Qaynoq24.uz kompaniya 25 mlrd dollargacha obligatsiya chiqarishni rejalashtirayotgani haqida yozgan edi.
