Namangan viloyatida tibbiyot muassasalari tomonidan fuqarolardan asossiz undirilgan qariyb 300 mln so‘m mablag‘ni qaytarish bo‘yicha ko‘rsatma berildi. Bu haqda Raqobat qo‘mitasining hududiy boshqarmasi ma’lum qildi.
Tekshiruvlar To‘raqo‘rg‘on, Uychi, Uchqo‘rg‘on, Chortoq va Yangiqo‘rg‘on tuman tibbiyot birlashmalarida o‘tkazildi. Unda tibbiy o‘lchash va sinov vositalarining metrologik holati hamda ularning bemorlarni tekshirishda qo‘llanishi o‘rganildi.
Natijada, ayrim tibbiy asbob-uskunalar belgilangan muddatlarda metrologik ko‘rikdan o‘tkazilmagan holda ishlatilgani aniqlandi. Shuningdek, narxnomaga kiritilgan, ammo amalda qo‘llanmagan materiallar uchun ham fuqarolardan haq olingani ma’lum bo‘ldi.
Tekshiruvlarga ko‘ra, shu yo‘l bilan qariyb 300 mln so‘m miqdorida asossiz daromad olingan. Mazkur holatlar yuzasidan hududiy boshqarma maxsus komissiyasi tomonidan ish qo‘zg‘atildi. “Iste’molchilar huquqlarini himoya qilish to‘g‘risida”gi qonun talablari buzilgani qayd etilgan.
Ko‘rib chiqish yakunida tibbiyot muassasalariga noqonuniy undirilgan mablag‘larni iste’molchilarga qaytarish bo‘yicha majburiy ko‘rsatmalar berildi.
Qaynoq24.uz Namanganda 920 mln so‘mlik noqonuniy tamaki to‘xtatilgani haqida yozgan edi.
