Samsung Galaxy S27 Pro smartfoni kutilganidan kattaroq akkumulyator bilan jihozlanishi mumkin. SamMobile ma’lumotiga ko‘ra, yangi model 5000 mA·soat sig‘imli batareyaga ega bo‘ladi.
Agar bu ma’lumot tasdiqlansa, Galaxy S27 Pro akkumulyator sig‘imi bo‘yicha avvalgi Galaxy S Ultra modellariga tenglashadi. Jumladan, Galaxy S26 Ultra ham 5000 mA·soat batareya bilan chiqarilgan.
Samsung bu yil Galaxy S27 qatorida to‘rtta modelni taqdim etishi mumkin. Ular Galaxy S27, Galaxy S27+, Galaxy S27 Pro va Galaxy S27 Ultra bo‘lishi kutilmoqda. Galaxy S27 Pro texnik jihatdan Galaxy S27 Ultra’ga yaqin model sifatida ishlab chiqilishi aytilmoqda. Biroq u kichikroq ekran va S Pen stilusisiz chiqarilishi mumkin.
Manbaga ko‘ra, Galaxy S27 Pro taxminan 6,5 dyuymli displeyga ega bo‘ladi. Qurilmada S Pen uchun joy bo‘lmagani sabab Samsung ichki bo‘shliqdan kattaroq batareya uchun foydalangan bo‘lishi mumkin.
Avvalgi xabarlarga ko‘ra, Galaxy S27 Pro Snapdragon 8 Elite Gen 6 Pro chipi bilan jihozlanadi. Smartfon 12 GB yoki undan ko‘proq tezkor xotira olishi kutilmoqda. Ichki xotira hajmi 256 GBdan boshlanishi mumkin. Kamera qismida esa 200 MP asosiy sensor bo‘lishi aytilmoqda.
Shuningdek, smartfon 50 MP ultrakeng kamera va 3,5 karra optik yaqinlashtirishga ega 50 MP teleobyektiv bilan jihozlanishi mumkin.
Old kamera 12 MP bo‘lishi kutilmoqda. Qurilma Wi-Fi 7, Bluetooth 6.0, UWB, NFC va USB 3.2 Type-C portini qo‘llab-quvvatlashi aytilmoqda.
Galaxy S27 Pro 60 wattli tezkor quvvatlash imkoniyatiga ham ega bo‘lishi mumkin. Hozircha Samsung bu ma’lumotlarni rasman tasdiqlamagan. Shu sababli Galaxy S27 Pro xususiyatlari hozircha dastlabki ma’lumot sifatida qabul qilinadi.
Qaynoq24.uz Samsung Galaxy S21 FE uchun yangi xavfsizlik yangilanishi chiqqani haqida yozgan edi.
