Eron harbiylari Isroilga qarshi raketa zarbalarini to‘xtatishini ma’lum qildi. BBC xabariga ko‘ra, bu qaror Eron va Isroil o‘rtasida aprel oyidan beri ilk bor to‘g‘ridan to‘g‘ri zarbalar almashinuvidan keyin e’lon qilindi.
Eronning oliy harbiy qo‘mondonligi bayonotida Isroilga zarbalar to‘xtatilgani aytilgan. Biroq Tehron Isroil Janubiy Livanga hujumlarni davom ettirsa, javob yanada keskin bo‘lishini ogohlantirdi. Bu bayonot AQSh prezidenti Donald Tramp Eron va Isroilni otishmani to‘xtatishga chaqirganidan keyin e’lon qilindi.
Tramp ikki davlat “zudlik bilan o‘t ochishni to‘xtatish” masalasini ko‘rib chiqayotganini aytgan. Avvalroq Isroil Eronning g‘arbiy va markaziy hududlariga havo zarbalari bergan edi. Shundan so‘ng Eron Isroilga raketalar uchirdi.
Yakshanba kuni Tramp Isroil bosh vaziri Binyamin Netanyahuga Eronga javob zarbasi bermaslikni tavsiya qilgani xabar qilingandi.
Eron aeroportlari va aeronavigatsiya kompaniyasi mamlakatdagi barcha reyslar noma’lum muddatga bekor qilinganini e’lon qildi. Eron Fuqarolik aviatsiyasi tashkiloti vakiliga ko‘ra, mamlakat havo hududining g‘arbiy qismi ham yopilgan.
Eron aprel oyining oxirida ayrim yo‘lovchi reyslarini tiklay boshlagan edi. Bundan oldin mamlakat havo hududi AQSh va Isroil zarbalari ortidan asosan yopiq qolgan.
Urush boshlanganidan keyin Eronning ayrim aeroportlari, jumladan Tehrondagi Mehrabod aeroporti ham hujumga uchragani aytilmoqda.
Shu bilan birga, Yevropa Ittifoqi Eronning Hormuz bo‘g‘ozidagi harakatlari sabab sanksiyalar joriy qildi.
Yevropa Ittifoqining tashqi siyosat bo‘yicha oliy vakili Kaja Kallas Tehron dengiz qatnoviga tahdid solayotganini bildirdi. Uning aytishicha, Eron dronlari Hormuz bo‘g‘ozidagi kema qatnovi xavfsizligiga tahdid solishda davom etmoqda.
Kallas Yevropa Ittifoqi ilk bor navigatsiya erkinligini himoya qilishga qaratilgan yangi sanksiya rejimini qo‘llaganini ma’lum qildi.
Hozircha Eron va Isroil o‘rtasidagi mojaroda barqaror sulhga erishilgani haqida rasmiy ma’lumot yo‘q.
Qaynoq24.uz Donald Tramp Isroil bosh vaziri Binyamin Netanyahu Eron bilan har qanday tinchlik bitimini qabul qilishini aytgani haqida yozgan edi.
