Samsung Galaxy Z Fold 8 Ultra buklama smartfoni haqida yangi ma’lumotlar tarqaldi. Bu haqda Gizchina ma’lum qildi. Qurilma katta batareya va tezroq quvvatlash bilan chiqishi kutilmoqda.
Ice Universe taxallusi bilan tanilgan insayderga ko‘ra, Galaxy Z Fold 8 Ultra 5 000 mA·soat sig‘imli akkumulyatorga ega bo‘ladi. Bu Galaxy Z Fold 7’dagi 4 400 mA·soat batareyadan 600 mA·soatga ko‘p.
Smartfon 45 W simli tezkor quvvatlashni qo‘llab-quvvatlashi aytilmoqda. Taqqoslash uchun, avvalgi Galaxy Z Fold 7 modeli 25 W quvvatlash bilan cheklangan edi. Bu Fold seriyasi tarixidagi eng katta batareya va quvvatlash yangilanishlaridan biri bo‘lishi mumkin. Samsung Fold 5, Fold 6 va Fold 7 modellarida 4 400 mA·soat batareya va 25 W quvvatlashdan foydalangan.
Yangi batareyaga qaramay, Galaxy Z Fold 8 Ultra og‘irligi 215 gramm bo‘lib qolishi kutilmoqda. Bu Galaxy Z Fold 7 bilan bir xil ko‘rsatkich.
Shuningdek, qurilma ochilgan holatda biroz yupqaroq bo‘lishi mumkin. Uning qalinligi 4,2 mm.dan 4,1 mm.gacha kamayishi aytilmoqda.
Manbaga ko‘ra, Samsung bunga kremniy-uglerod batareya texnologiyasi orqali erishgan bo‘lishi mumkin. Ushbu texnologiya raqobatchilarga kattaroq sig‘imli batareyalarni yupqa korpusga joylashtirish imkonini bermoqda.
Texnik imkoniyatlari qanday bo‘ladi
Galaxy Z Fold 8 Ultra simsiz quvvatlash bo‘yicha ham yangilik olishi mumkin. Qurilma taxminan 20 W Qi2.2 simsiz quvvatlashni qo‘llab-quvvatlashi aytilmoqda.
Bu Fold Ultra qatorida MagSafe mos aksessuarlar orqali quvvatlash imkonini beradigan ilk model bo‘lishi mumkin. Dizayn va asosiy forma esa katta o‘zgarishsiz qolishi kutilmoqda. Ice Universe Galaxy Z Fold 8 Ultra’ni kattaroq batareya, tezroq quvvatlash va yangi chip olgan Galaxy Z Fold 7 deb ta’riflagan.
Yangi model Samsung‘ning an’anaviy balandroq va torroq buklama formatini saqlab qoladi. Shu bilan birga, Samsung Galaxy Z Fold 8 nomli kengroq modelni ham tayyorlayotgani aytilmoqda. Avval bu qurilma Galaxy Z Fold 8 Wide nomi bilan tilga olingan.
Kengroq Galaxy Z Fold 8 201 gramm og‘irlikka ega bo‘lishi, ichki ekrani 4:3 nisbatda chiqishi mumkin. Unda 4 800 mA·soat batareya va 45 W quvvatlash bo‘lishi kutilmoqda. Galaxy Z Fold 8 Ultra esa 5 000 mA·soat batareya va 45 W quvvatlash bilan taklif etilishi mumkin.
Samsung yangi buklama smartfonlarini 22-iyul kuni Londonda o‘tadigan Galaxy Unpacked tadbirida namoyish qilishi kutilmoqda. Tadbirda Galaxy Z Flip 8, Galaxy Watch 9 seriyasi va Galaxy AI Glasses ham taqdim etilishi mumkin.
Hozircha bu ma’lumotlar rasmiy tasdiqlanmagan. Shu sababli texnik tafsilotlar taqdimotgacha o‘zgarishi mumkin.
Qaynoq24.uz Samsung Galaxy Z Fold 8 Wide yengilroq bo‘lishi mumkinligi haqida yozgan edi.
