Xiaomi tarkibidagi Redmi brendi yangi Redmi Note 17 Pro Max smartfoni ustida ishlamoqda. Bu haqda Gizchina ma’lum qildi.
Sizib chiqqan ma’lumotlarga ko‘ra, bu model o‘rta segment uchun juda katta yangilanish bo‘lishi mumkin. Smartfon 10 000 mAh sig‘imli batareya bilan jihozlanishi kutilmoqda. Bu oldingi Note 15 Pro+ dagi 6 500 mAh dan ancha katta. Oddiy foydalanishda qurilma bir necha kun ishlashi mumkin. 100 Vt tezkor quvvatlash ham qo‘llab-quvvatlanadi.
Ekran ham sezilarli darajada kattalashadi. Qurilmada 7 dyuymli tekis panel bo‘lishi aytilmoqda. Bu smartfonni planshetga yaqinlashtiradi. Video ko‘rish va o‘yinlar uchun katta ustunlik beradi. Lekin kundalik olib yurishda noqulay bo‘lishi mumkin. Texnik tomondan qurilma MediaTek Dimensity 7500 protsessori bilan ishlaydi. Bu Redmi uchun Qualcomm’dan MediaTek’ka o‘tishni anglatadi. Chipset o‘rta segment uchun yetarli darajada kuchli hisoblanadi.
Kamera qismi ham diqqatga sazovor. Asosiy modul 200 MP bo‘lib, Samsung ISOCELL HP5 sensori ishlatiladi. U yuqori detal va yaxshi kadr kesish imkonini beradi. Orqa panelda faqat 8 MP ultra keng kamera bo‘lishi aytilmoqda. Telefoto modul hozircha ko‘rinmayapti. Old kamera 32 MP bo‘ladi. Bu sensor avvalgi Note 15 Pro+ modelida ham ishlatilgan. Selfi va video uchun yetarli darajada sifat beradi.
Yana bir qiziq jihat shundaki, Redmi Note 16 seriyasi umuman chiqarilmasligi mumkin. Kompaniya to‘g‘ridan-to‘g‘ri Note 17 ga o‘tishni rejalamoqda. Bu yangi modelni katta yangilanish sifatida ko‘rsatadi. Model Xitoyda 2026-yil yozida taqdim etilishi kutilmoqda. Global bozorlarga esa 2026-yil oxiri yoki 2027-yil boshida chiqishi mumkin.
Qaynoq24.uz Redmi 12 000 mA/soat batareyali smartfon ustida ishlayotgani haqida yozgan edi.
