Toshkent tumanidagi xonadonlardan birida 72 ming dona qalbaki aksiz marka aniqlanib, ashyoviy dalil sifatida olindi. Bu haqda Bosh prokuratura huzuridagi Departament ma’lum qildi.
Departamentning Toshkent tumani bo‘limi va boshqa huquqni muhofaza qiluvchi organlar hamkorligida tezkor tadbir o‘tkazilgan. Tadbir davomida “Gultepa” MFY hududida yashovchi fuqaro A.G‘.ning xonadoni ko‘zdan kechirilgan. Ma’lum qilinishicha, u avval sudlangan.
Tekshiruvda xonadondan alkogol mahsulotlari uchun mo‘ljallangan 72 ming dona qalbaki aksiz marka topilgan. Ular o‘tkazish maqsadida saqlab kelingani aytilmoqda. Mazkur aksiz markalar ashyoviy dalil sifatida olingan.
Holat yuzasidan Jinoyat kodeksining 176-moddasi, ya’ni qalbaki pul, aksiz markasi yoki qimmatli qog‘ozlar yasash hamda ularni o‘tkazish moddasi bilan jinoyat ishi qo‘zg‘atilgan. Hozirda tergov harakatlari olib borilmoqda.
Qaynoq24.uz Farg‘onada gaz va elektrdan noqonuniy foydalanish fosh etilgani haqida yozgan edi.
