AQSh prezidenti Donald Tramp Eron bilan kelishuvga erishilmaguncha blokada bekor qilinmasligini bildirdi. Bu haqda BBC xabar berdi.
Trampning aytishicha, bir hafta oldin boshlangan blokada Eron iqtisodiyotiga jiddiy zarba bermoqda. U ijtimoiy tarmoqdagi sahifasida AQSh mojaro jarayonida ustunlikka ega ekanini ham ta’kidladi. Vaziyat vaqtinchalik sulh muddati tugash arafasida yanada noaniq tus olmoqda. Sulh chorshanba kuni yakunlanadi. Shu bilan birga, Pokistonda bo‘lishi kutilayotgan yangi muzokaralar ham savol ostida qolmoqda.
AQSh delegatsiyasiga vitse-prezident Jey Di Vens boshchilik qilishi kerak. Ammo u hali Vashingtondan jo‘nab ketmagan. Eron esa muzokaralarda qatnashish bo‘yicha hali yakuniy qaror chiqarmaganini bildirgan. AQSh Markaziy qo‘mondonligi ma’lumotiga ko‘ra, blokada boshlanganidan beri 27 ta kema ortga qaytarilgan yoki yo‘nalishini o‘zgartirishga majbur bo‘lgan. Shuningdek, ilk bor Eron bayrog‘i ostidagi yuk kemasi to‘xtatilib, qo‘lga olingan.
Tehron bu harakatni “qaroqchilik” deb atadi va sulhga zid ekanini bildirdi. Shu bilan birga, Eron ham Hormuz bo‘g‘ozini deyarli ikki oydan beri yopib qo‘ygan. Bu esa global energiya narxlarining keskin oshishiga sabab bo‘ldi.
Eron tomoni yo‘l AQSh blokadasi to‘xtatilmaguncha ochilmasligini aytmoqda. Tramp esa Eron sulhni buzib, yana hujum boshlaganini ta’kidladi.
Muzokaralarning ikkinchi bosqichi hali ham noaniq.
Avvalgi uchrashuvdan so‘ng Vens tomonlar kelishuvga yaqinlasha olmaganini bildirgan edi. Eron tashqi ishlar vazirligi esa AQShni “haddan tashqari talablar” qo‘ymaslikka chaqirdi. Shunga qaramay, Islomobodda muzokaralarga tayyorgarlik ko‘rilmoqda. Xavfsizlik kuchaytirilgan, mehmonxonalar bo‘shatilgan va asosiy yo‘llar yopilgan.
Qaynoq24.uz Eron AQSh bilan yangi muzokaralarda qatnashish masalasini ochiq qoldirgani haqida yozgan edi.
