Xitoy Tashqi ishlar vazirligi Hormuz bo‘g‘ozi orqali xavfsiz va erkin harakatlanishni tezroq tiklash barcha tomonlar manfaatiga mos kelishini bildirdi. Bu haqda vazirlik vakili Lin Szyan ma’lum qildi.
Uning ta’kidlashicha, Hormuz bo‘g‘ozi xalqaro yuk tashish uchun muhim dengiz yo‘lagi hisoblanadi. Shu sababli mazkur hududda xavfsiz va erkin o‘tishni ta’minlash nafaqat mintaqa davlatlari, balki global savdo ishtirokchilari uchun ham muhim ahamiyatga ega.
“Hormuz bo‘g‘ozi xalqaro yuk tashishda foydalaniladi. Xavfsiz va erkin o‘tishni tezda tiklash barcha tomonlar manfaatlariga mos keladi”, dedi Xitoy TIV vakili.
Lin Szyanning so‘zlariga ko‘ra, Xitoy ushbu masala bo‘yicha manfaatdor davlatlar va xalqaro hamjamiyat bilan aloqalarni davom ettirishga tayyor. Diplomat, shuningdek, Pekin Xitoyga tegishli hamda Xitoy bayrog‘i ostida harakatlanayotgan kemalarning xavfsizligini himoya qilish uchun zarur choralarni ko‘rishda davom etishini ta’kidladi.
Avvalroq AQSh vitse-prezidenti J.D. Vens Vashington Hormuz bo‘g‘ozi uzoq muddatda erkin navigatsiya uchun ochiq qolishini kutayotganini bildirgan edi. Uning aytishicha, so‘nggi 24 soat ichida bo‘g‘oz orqali yuk tashish hajmi oshgan.
Hormuz bo‘g‘ozi jahon energetika bozori uchun strategik ahamiyatga ega dengiz yo‘llaridan biri hisoblanadi. U orqali Fors ko‘rfazi davlatlaridan neft va gaz eksportining muhim qismi amalga oshiriladi. Shu bois bo‘g‘oz atrofidagi har qanday keskinlik xalqaro savdo va energiya narxlariga ta’sir ko‘rsatishi mumkin.
Qaynoq24.uz Eron Hormuz bo‘g‘ozini barcha kemalar uchun yopishini e’lon qilgani haqida yozgan edi.
