Huawei kompaniyasi yangi Huawei Nova 15 Max smartfonining tashqi ko‘rinishini oshkor qildi. Bu haqda Huaweicentral ma’lum qildi.
Qurilma global taqdimot arafasida namoyish etildi va u o‘zining kuchli batareyasi bilan e’tibor qozonmoqda. Smartfon oltin rangli korpus bilan ishlab chiqilgan. Orqa panelda katta dumaloq kamera bloki joylashgan bo‘lib, dizayn jihatdan premium segmentga yaqinlashgan. Old tomonda esa yupqa ramkali tekis ekran va kichik teshik ko‘rinishidagi selfi kamera mavjud.
Texnik jihatdan qurilma uchta kameraga ega bo‘ladi. Asosiy modul 50 megapikselli RYYB sensor bilan jihozlanadi. Bundan tashqari, stereo dinamiklar va alohida X tugmasi ham mavjud bo‘ladi. Modelning eng asosiy jihati uning batareyasidir. Qurilmada 8500 mAch sig‘imli akkumulyator qo‘llanadi. Bu ko‘rsatkich smartfonlar orasida ancha yuqori bo‘lib, uzoq ishlash imkonini beradi.
Dastlabki ma’lumotlarga ko‘ra, Nova 15 Max aslida Xitoy bozoridagi Huawei Enjoy 90 Pro Max modelining global versiyasi bo‘lishi mumkin. Qurilmaning to‘liq texnik tafsilotlari va farqlari yaqin kunlarda o‘tkaziladigan rasmiy taqdimotda e’lon qilinadi.
Qaynoq24.uz Huawei Pura 90 Pro seriyasi taqdim etilgani haqida yozgan edi.
