Kia’ning flagman elektr krossoveri Kia EV9 egalari tortuvchi batareya bilan bog‘liq muammolar haqida ko‘proq shikoyat qila boshladi. Ayrim avtomobillar uzoq muddat servisda turib qolayotgani aytilmoqda.
The Verge ma’lumotiga ko‘ra, Buyuk Britaniyadagi EV9 egalaridan biri avval 12 voltli akkumulyator muammosiga duch kelgan. Shu sabab avtomobil eshiklari ochilmay qolgan. Keyinroq haydovchi asosiy tortuvchi batareyani quvvatlashda ham g‘alati holatlarni sezgan. Avtomobil ekranida quvvat darajasi 82 foizdan birdan 100 foizga sakragan. Shu bilan birga, yurish zaxirasi ham sezilarli kamaygan.
Diagnostika skaneri orqali tekshiruv o‘tkazilganida muammo jiddiyroq ekani aniqlangan. Avtomobil 100 foiz quvvatlanganini ko‘rsatgan bo‘lsa-da, batareya amalda 99,8 kVt/soat o‘rniga taxminan 71 kVt·soat energiya saqlay olgan. Bu tortuvchi batareya sig‘imining qariyb 30 foizga kamayganini anglatadi. Keyingi diagnostika akkumulyator blokidagi bir nechta modul nosozligini ko‘rsatgan.
Kia servis markazi nosozlikni tasdiqlagan va batareyani kafolat asosida to‘liq almashtirishga qaror qilgan. Biroq egasiga ta’mirlashning aniq muddati aytilmagan. Kia EV9 tortuvchi batareyasi sakkiz yillik kafolat bilan qoplanadi. Ammo ehtiyot qismlar, xususan, batareya bloklari yetishmasligi ta’mirlash jarayonini cho‘zmoqda.
The Verge ma’lumotiga ko‘ra, Buyuk Britaniyada shunga o‘xshash o‘ndan ortiq holat ma’lum. Ba’zi EV9 egalari avtomobillari yangi batareya kutib, uzoq vaqt harakatsiz turganini bildirgan. Shunga o‘xshash shikoyatlar AQShda ham paydo bo‘la boshlagan. Bu muammo faqat Buyuk Britaniya bilan cheklanmasligi mumkinligini ko‘rsatadi.
Hozircha Kia EV9 bo‘yicha rasmiy chaqiruv kampaniyasini e’lon qilmagan. Shu bois muammo alohida servis holatlari sifatida ko‘rib chiqilmoqda.
Kia EV9 bozorda kompaniyaning eng muhim elektr krossoverlaridan biri sanaladi. Model flagman maqomiga ega va qimmat segmentda raqobatlashadi.
Batareya bilan bog‘liq bunday holatlar xaridorlar ishonchiga ta’sir qilishi mumkin. Ayniqsa, ta’mirlash muddati cho‘zilsa, avtomobil egasi qimmat krossoverdan foydalana olmay qoladi.
Qaynoq24.uz BYD 1800 km yura oladigan yangi krossoverini chiqarishi haqida yozgan edi.
